Schwengle: Tur partido di acuerdo pa sigui cu plan di operatiekamer

ORANJESTAD – E hecho cu tin tardansa cu e feitenonderzoek di e caso di operatiekamer di Horacio Oduber Hospital, no ta nifica cu cosnan no ta canando. Segun minister encarga cu salud Alex Schwengle, despues di un reunion largo y fructifero y lagando tur “pero”, polemica y problematica un banda, tur partido envolvi den e renobacion, expansion y maneho di hospital, incluyendo ministerio di Salubridad, ta di acuerdo pa procede cu e trabou pa agrega e salanan di operacion na e proyecto. Asina e mandatario ta sigura pa medio di un comunicado diadomingo. 

DISCUSIONAN TA CONOCI

E discusionnan ta conoci y Minister dr. Alex Schwengle y tur esunnan envolvi den e proyecto ta di acuerdo cu mester simplemente laga e investigacion di hecho (“feitenonderzoek”) tuma su curso. Mientrastanto e gruponan di interes aki mes, como un grupo di trabou, ta sigui padilanti y ta enfoca riba solucionnan y e construccion ideal, tanto di infrastructura como financiero, pa agrega e salanan di operacion na e proyecto. E OK nobo mester bin, esey ta fuera di discusion, Schwengle a bisa enfaticamente.

ENFOKA RIBA MALO Y BON

E mandatario ta subraya cu si keda enfoca riba loke a bay malo no ta trece solucion, y pues entretanto Raad van Toezicht di hospital a pone e feitenonderzoek den man di un compania independiente y e planning pa e salanan di operacion (OK, operatiekamer) a sigui. Minister Schwengle ta splica cu e “basisschets” ta cla, incluyendo un “programma van eisen” di tur partido. Den e plan concreto ta tene cuenta cu tur stakeholders, incluyendo e gruponan cu ta haci uzo di y ta traha riba OK, e ta agrega.

TOETSING DI PLAN DI OK

Loke a tuma luga den e reunion riba diahuebs ta un “toetsing” di e plan y a wak si e presupuesto cu a wordo sugeri y kico lo haya p’e proyecto ta concorda cu otro. A laga evalua e prome plan y, segun Minister Schwengle, ta mustra hopi bon, tabatin algun punto di discusion cu a wordo repasa y lo tene cuenta cu e puntonan aki. Minister Schwengle a bisa cu awo loke mester pasa ta duna e nota pa procede pa asina dal bay cu e negociacionnan cu ta inclui ful e team cu ta envolvi den e proyecto: raad van toezicht y raad van bestuur di hospital, e comision di construccion, infrateam y gobierno. E mandatario a bisa cu e lo bolbe parlamento pa informa comunidad pa medio di e organo aki di tur detaye di e proyecto, esta con e OK ta bay bira, kico e prijs ta, pakico e prijs ta asina y kico e necesidad su tras ta. E ta consider’e su deber pa duna claridad na pueblo pa medio di Parlamento, sea cua sea e resultado, pero e ta bay Parlamento cu plannan concreto asina cu nan ta cla.

PLACHI FINANCIERO

E “plachi financiero” ta un di e puntonan di discusion mas grandi, pasobra agregando riba e proyecto ta nifica un aumento den e suma cu lo paga anualmente na huur di e edificio. Minister Schwengle y esunnan envolvi ta purbando di logra keda den e mesun suma cu ya ta stipula, sinembargo e realidad ta cu esaki lo no ta posibel y e mandatario ta bisa cu ora tur plan y calculacion ta cla e mester splica Parlamento y pidi pa permiso pa introduci cambio den e tarifa di huur.