Despues di 27 aña, ley di ‘kinderopvang’ ta yega Parlamento

ORANJESTAD – Despues di 27 aña cu a cuminsa traha riba e ley di ‘kinderopvang’, y 53 aña despues cu a cuminsa cu e prome ‘cuido di mucha’, esaki porfin a keda cla y a wordo manda pa Parlamento di Aruba. Preocupacion di nos comunidad pa sigura un garantia di cuido y awor esaki ta bira un hecho. Minister di Enseñansa Michelle Hooyboer via un comunicado ta mustra cu for di momento cu el a haya e cartera actual, ela traha riba esaki.

PREPARACION PA E LEY 

E mandatario ta sigura cu tur preparacion solido cu por wordo haci durante e periodo aki den un mucha su bida ta preparanan pa un miho exito una bez nan drenta scol prepatorio y basico. “Mi a logra hiba e ley aki hunto cu e cartera nobo y a sigui traha riba un ley pa reglamenta cuido y guia di mucha na Aruba, e asina yama Landsverordening kinderopvang", e Minister a splica. Pa cubri e periodo cu e mucha ta bai scol preparatorio y basico caminda hopi mucha ta bai un opvang a amplia e ley aki pa e edad di 0 aña te cu e momento cu e mucha caba scol basico. Pa finalisa e ley a papia cu varios persona cu ta trahando den e area aki pa determina varios di e normanan cu ta inclui den e ley. 

BENEFICIO DI E LEY

Cu e ley aki gobierno ta garantisa cu crèche / centronan di mucha (kinderopvang) na Aruba ta ofrece un calidad minimo cu ta responsabel y ta garantisa proteccion di e muchanan. Gobierno ta cumpli asina cu Tratado Internacional di Derechonan di Mucha. E ta proteha tambe e doñonan di un centro di mucha y e lidernan, pasobra nan sa na cua exigencia nan tin cu tene nan mes na dje. Mayornan por sinti nan mes mas trankil, pasobra nan sa cu tin exigencianan minimo y cu tin calidad.

KADERWET

E ley ta considera un “kaderwet” unda diferente puntonan regardando e calidad minimo cu mester tin pa opera un creche of centro di mucha ta stipula. Esaki por wordo expandi den futuro segun necesidad.  A scohe pa un concepto di “vergunningsplicht” pa esnan cu kier opera un centro di mucha. Ta trata aki di diferente normanan cu mester cumpli pa por opera e centro. 

CRÈCHE DI CALIDAD TA META PRINCIPAL

E meta principal ta pa crea crèchenan cu ta centronan di calidad pa nos muchanan, dunando e doñonan instrumento y guia pa por yega na dje. Asina cu e ley wordo aproba lo organisa diferente curso y charlanan pa personanan trahando den e crèche centronan aki pa guia nan door di e normanan y con nan lo por ofrece e miho posibel ambiente pa e muchanan den nan cuido.