Herde: Laf di Bosman pa busca excusa pa no cumpli cu mocion

ORANJESTAD - “Ta masha laf (pa no bisa hipocrita) di sr. (Andre) Bosman (parlamentario Hulandes pa partido VVD) pa awor, seis aña despues busca excusa pa no cumpli cu palabracionnan haci y mocion entrega y aproba door di su parlamento”. Asina lider di fraccion di AVP Rene “Baba” Herde a reacciona riba e parlamentario Hulandes. Bosman, den NoticiaCla.com a critica e parlamentario di AVP, cu e ta purba desvia di e problema pa parlamento keda cla cu presupuesto, usando e asunto di geschillenregeling cu e 4 parlamentonan den Reino kier.

PREGUNTA DI NOTICIACLA

Siman pasa tabata NoticiaCla.com cu a acerca e mandatario Hulandes encarga cu Reino Hulandes, Ronald Plasterk riba su ‘cambio repentino’ riba e asunto controversial di ‘geschillenregeling’. Plasterk a bin cu un proposicion practico pa e geschillenregeling, cual Herde a rechasa, pero Bosman si ta simpatisa. Y aki e ‘discusion entre Herde y Bosman” a cuminsa.

REACCION HERDE

Den su reaccion, Herde ta mustra cu "e mocion Yrausquin/Herde cu ta pidi pa institui e ‘areglo di conflicto’ ta di april 2010. El a wordo aproba pa 2de Kamer di Parlamento Hulandes. E palabracion den IPKO di mei 2013 a pidi pa institui e "areglo di conflicto" prome cu fin di 2013. E acuerdo entre e cuatro parlamentonan di juni 2015 tambe ta los di tur otro tema. Como tal, segun Herde, - “Ta masha laf (pa no bisa hipocrita) di sr. (Andre) Bosman (parlamentario Hulandes pa partido VVD) pa awor, seis aña despues busca excusa pa no cumpli cu palabracionnan haci y mocion entrega y aproba door di su parlamento”

CONTRA

Segun Herde, ta Bosman personalmente ta contra di un areglo pa conflicto pa Reino. Pasobra e kier pa Hulanda semper tin e ultimo palabra den tur asunto cu ta toca paisnan autonomo di Reino. Ta p'esey e no kier niun areglo cu ta independiente di politica y cu ta obliga gobiernonan pa ehecuta e decision. E kier ta huez di su propio decisionnan. “Esey no por den un democracia! Sr. Bosman lo haci bon di keda "al caso" y wak con el a sostene bez tras bez violacionnan di Statuto y Reglamento di Orden di Gobernadornan di Aruba, Corsou y Sint Maarten” Herde a bisa. Pero segun e lider di e fraccion berde, Bosman no kier reconoce su erornan y p'esey mes ora a purba descualifica e conseho di Raad van State cu a mustra riba e violacionnan flagrante di su gobierno.

FINANSAS PUBLICO

Pa loke ta finansa publico di Aruba tambe Bosman ta fout. “ Sigur si bo compara desaroyo economico, laboral y social di Aruba cu esun di Hulanda of otro partinan di Reino”. Ron Gomez Caseres di Corsou a bisa for di 2013 cu mester inverti den nos paisnan, stimula economia y inverti den progreso di nos hendenan. Esey Aruba a haci. Esey no ta loke Hulanda a haci y esey ta loke bou CFT Corsow y Sint Maarten no por a haci. “Pero dia cu sr Bosnan kier discuti finansa publico di un forma sincero y "al caso" e ta welcome." Herde a finalisa su comentario na NoticiaCla.com.