Minister Plenipotenciario di Aruba na celebracion Dia di Bandera di Curaçao

Den Haag – Den WTC Beurs na Rotterdam a tuma lugar diadomingo 27 di juli e celebracion di Dia di Bandera di Curaçao na Hulanda. E parti mainta a consisti di un programa protocolario pa invitadonan y despues a sigui e parti festivo pa publico. Minister Plenipotenciario Alfonso Boekhoudt na e ocacion aki a hiba un discurso den cual el a felicita - den nomber di Gobierno y pueblo di Aruba – Curaçao cu nan dia nacional. E mandatario a cuminsa na bisa cu e fecha di 2 di juli ta un fecha historico pa motibo cu ariba 2 di juli 1951, e conseho insular di Curaçao pa prome biaha a reuni. Na 1984 e fecha aki a keda stipula como Dia di Bandera. ‘Kico ta e nificacion pa un pais tin su mesun bandera? E bandera ta traha como cement pa e proceso di “nation building”; e ta parti di nos identidad cu ta haya mas estatura cu ayudo di aspectonan cultural di nos mes, manera nos musica, nos bailenan y nos cultura. Tur esaki ta determina ken nos ta. ‘

Sr. Boekhoudt a bisa cu e Dia di Bandera di Curaçao tambe ta wordo celebra na Aruba. ‘Bo ta mira mas y mas auto ariba e dia ta corre cu bandera chikito di Curaçao. Esaki ta acentua cu e laso entre Aruba y Curaçao, ta uno caluroso y estrecho, pero tambe uno real. Ambos pais ta traha hunto ariba diferente tereno. Tambe e relacion entre e Gabinete di Minister Plenipotenciario di Aruba y Curaçao ta sumamente agradable y placentero. Mi mes a traha un periodo cortico di dos aña y mei na Curaçao. Durante e periodo aki mi tabata tin e oportunidad pa cera conoci mas ainda cu Curaçao y su hendenan. Sinceramente mi por bisa “Mi stima dushi Corsou”, asina e mandatario a bisa. Minister Boekhoudt a termina na felicita e comunidad Curasoleño ariba nan dia y spera cu nan disfruta di e celebracion den WTC Rotterdam. Foto ta pa cortesia di Caïnva Isenia.