Bus accidenta di Arubus a wordo ge-serviced e siman aki ainda

ORANJESTAD – E bus di Arubus cu a cay den rooi na Playa awe mainta, a consecuencia di un accidente di trafico (lesa e relato inicial aki) a pasa su test di mantenimento apenas e siman cu a pasa. Asina e director di Arubus Teo Croes a sigura NoticiaCla.com diasabra mainta despues di e suseso. Segun Croes, esaki tabata un di e miho busnan cu nan tabatin. “Esaki a wordo ge-serviced e siman aki y ela pasa e test sin problema” Croes a sigui bisa.

UPDATE RIBA PASAHERONAN

Tabatin 21 pasahero den bus, di cual 7 a haya lesion leve y mester a wordo transporta pa Hospital. Segun Croes, e prome trabou di Arubus tabata pa sigura cu e pasaheronan nan estado di salud tabata ok. A yama slachtoffer hulp tambe, banda di e personal di ambulance. Adicionalmente papiando tambe cu e comandante di bombero, Edward de Cuba, el a bisa NoticiaCla.com, cu net despues di e accidente a nota cu 4 di e pasaheronan tabatin mester di atencion mesora y tabata e promenan cu a wordo transporta cu urgencia pa hospital. Segun Croes, esnan cu no ta grave lesiona, a wordo transporta pa nan cas cu un van priva. Na prome instante e director di Arubus no por a bisa cu exactitud cuanto pasahero tabata riba e bus, pero despues di algun rato e informacion corecto (21) a drenta. Despues cu a keda cla cu e pasaheronan, a sigui pa e bus mes. E seguro di Arubus lo cubri e gastonan medico di e pasaheronan cu por a keda lesiona.

SITUACION DI CHAUFFEUR

E chauffeur, segun Arubus, a sa di maneha e situacion di tal forma cu el a evita un mayor desastre, esta cu e bus lo por a bolter den su caida den e rooi. Ora cu a bay check e chauffeur despues di e accidente, a resulta cu e no tabatin nada grave. “El a haya un par di sla, pero nada grave. Inicialmente e no kier a bay (hospital), pero nos a bis'e cu e mester a bay” Croes a sigui bisa.

FLOTA FOR DI SERVICIO

Cu e accidente aki di awe mainta, e ta bira e di 4 bus nobo cu ta for di servicio pa motibo di accidente, segun Croes. Di e otronan tambe tin for di servicio y ta papia di 3. Pues na tur, tin 7 bus total cu ta for di servicio aworaki. E bus accidenta awe mainta, lo ta for di servicio pa por lo menos 1 pa 2 luna pa e wordo drecha y subi caminda atrobe. Den combersacion cu e comandante, a takel e bus sac'e for di e rooi, pone riba un flatbom y transport'e bek pa garashi di Arubus, pa e wordo drecha. Riba su mes, no un trabou grandi, pero si mester a usa un grua grandi pa logra e trabou. Pa loke ta e accidente mes, Croes a comparti cu esaki ta prome biaha cu algo asina ta sosode, for di tempo cu e ta director di e compania, y tambe ora cu e no tabata director, e no ta corda cu algo asina a yega di sosode.