Ex miembro di SMOA ta desmenti disputa interno pa e retiro ‘en bloc’

ORANJESTAD – E hecho cu 3 miembro di Raad van Toezicht a retira ‘en bloc’ e siman aki di Stichting Middelbaar Onderwijs Aruba (SMOA), no tin nada di haber cu disputa interno. “Mi por garantisa bo 1000% cu absolutamente no tin disputa interno” Rene Kan, como un di e miembronan cu a retira, a sigura NoticiaCla.com diabierna atardi. Hunto cu Kan, sra Ellis, y e presidente Jossy Lacle a entrega nan retiro. Nan a participa nan retiro diaranson ultimo segun rector di Colegio Arubano Hans Timmermans a bisa coleganan di e scol den un carta interno cu NoticiaCla.com tin den su poder. Segun e rector, e la ‘gradici nan pa nan input den Colegio. “Hopi ocupa cu otro trabounan ta e motibo duna” Timmermans ta sigura den e carta.

RETIRO ‘EN BLOC’

Ora cu un miembro di un hunta di supervision retira, ta algo. Pero ora cu 3, incluyendo e presidente retira den un solo tiro, e ta crea speculacion y rumor. Y como tal e ta bira noticia. Informacion cu NoticiaCla.com a haya internamente, ta cu lo tin desacuerdo entre e hunta di supervision, y cu nan no por a haya otro riba maneho y cu tabatin hopi presion. Presion riba kico exactamente no ta conoci. “Pero ora cu tres persona, y sigur no incluyendo e presidente, ta dicidi di retira ‘en bloc’, e ta zona hopi sospechoso”, e fuentenan a bisa NoticiaCla.com.

RETIRO ‘EN BLOC’ TA BIRA NOTICIA

Den e caso aki, Kan ta compronde cu esaki por bira noticia, y a sigura NoticiaCla.com como tal cu nada ta berdad di un disputa. “E cos ta cu nos (ami cu Jossy) a haci hopi trabou pa e scol y ta tempo pa traha caminda pa hende nobo” Kan a bisa. E hunta di supervision ta consisti di 7 persona, pero ta permiti pa tin ‘apenas’ 3 pa 5 miembro. “Pues nada robes cu esaki” Kan a sigui bisa. Mientras cu awor ta e tresnan aki, Kan no ta descarta cu lo tin mas cu por retira “Mi no sa. Pero mi ta priminti bo cu nos tin un directiva hopi capaz, y cu no tin ningun (zero) conflicto”. De hecho, segun Kan, ta net lo contrario. “Nos a haci hopi progreso ultimo tres aña, y tin un rector hopi capaz”.

CAMBIONAN POSITIVO

Kan ta mustra cu nan a haci hopi progreso den cambia e statute bieu y a logra haya e scol pa cumpli cu e normanan nobo cu Hulanda ta rekeri, a percura pa drecha e parti financiero y a ricibi declaracionnan positivo di e auditor nan di PWC.” Nos a tuma un tremendo rector, dedica hopi tempo na e problema di entrada di (alumnonan ) MAVO. Tempo ta awor pa otro tuma e rienda. E scol ta den bon man y tin un directiva hopi capabel” Kan a finalisa bisando. 

.