Elimina criadero di sangura rond di bo cas... Accion di GKMB hunto cu Serlimar

ORANJESTAD -Durante luna di november tin accion di GKMB y Serlimar den 4 diferente districto. Noord ta e prome districto riba 8 di november di 8 am – 2 pm banda di Colegio Felipe B. Tromp na Montaña lo bay tin diferente baki grandi pa habitante di Noord pone nan desperdicio depende kico e sushi ta. Fin di aña tur hende kier rond di nan cas ta limpi, p’esey tira bista rond di bo cas, pero tambe pafo di cura pa tur locual bo kier deshaci di dje. Asina aki tambe ta elimina obheto cu por bira potencial criadero. Un criadero por ta cualkier obheto cu ta contene awa sea di yobida of cranchi cu sangura por broei aden. Cu otro palabra deshaci di criadero na bo cas: bolter hemchi cu awa para, bira scoter bou di mata cu ta contene awa, haci bari di awa bashi. Kita sushedad rond di cas of pafo di cura, manera taira, cups, tapadera, pero tambe wasmashin, stoof of frigidair bieu cu por fungi como criadero. Un bon chens pa controla si e pos di bo cas ta bon tapa. No solamente cu tapadera, pero pone un gaas riba e tubo pa saca gas di pos pa asina evita cu e sangura por drenta den pos. Den e pos por tira contenido di un boter di kerosin pa evita cu e larvanan por desaroya y bira sangura. Ora uza kerosin haci esaki conscientemente, pasobra tin cu tene cuenta cu nos medio ambiente y no pomp tur awa for di pos ora ta muha mata. Tin chens cu e kerosin tambe por wordo gepomp. Otro opcion pa tira den pos ta un tipo di ‘donut’ cu ta cumpra na pestcontrol. Constantemente sigui tira bista den y rond di bo cas pa criadero y duna un man na bo bisiña cu tin edad halto pa elimina criadero den y rond di su cas. Sangura Aedes aegypti ta trece malesa manera Dengue y Chikungunya, cu den cierto caso por causa hasta morto. P’esey ta importante pa elimina tur criadero di sangura. Inspectornan di GKMB lo ta den districto di Noord riba diadomingo pa controla y duna informacion na publico. Departamento di Salud Publico hunto cu Serlimar ta haci un apelacion na e pueblo di Noord pa probecha di e ocasion cu e bakinan di sushi ta den na bario. Por tuma contacto cu Gele Koorts en Muskieten Bestrijding na tel. 585-3325. Nos salud ta nos responsabilidad.