Gobierno di Corsou a cay awe mainta!

WILLEMSTAD – Gabinete Whiteman a cay awe mainta na Corsou. Motibo di esaki ta e separacion di parlamentario pa partido PAIS, Marilyn Moses, cu a kita su sosten di e partido y declara su mes independiente. E momento ey no tabata sigur si esey lo a nifica automaticamente caida di e gabinete. Algun rato pasa, colega di prensa Mariano Heyden a confirma cu enberdad ta definitivo cu gobierno di Corsou a cay.

CARTA DI RETIRO

Pa loke ta e retiro di Moses, el a manda un carta pa presidente di parlamento riba e topico aki. “Pa medio di esaki mi ta informa bo cu, entrante awe, mi no ta forma parti mas di fraccion di partido Pais den Parlamento di Corsou” e carta ta cuminsa bisa. “Entrante awe mi ta un miembro independiente den Parlamento di Corsou. Como tal mi ta retira mi participacion den e coalicion den Parlamento di Corsou, cu ta sostene e gabinete Whiteman. Entrante awe e gabinete aki no por conta cu mi sosten den Parlamento di Corsou mas” e carta ta finalisa bisando, firma pa Moses mes. Mas informacion na caminda.