Fundacion Salba Urirama lo hiba pais Aruba corte atrobe

ORANJESTAD – Fundacion Salba Urirama ta bay entama un caso, mas probable contra pais Aruba pa e.o. revoca e permiso di molester (hinderwetvergunning) relaciona cu e parke di molina Urirama. Asina su presidente Holmo Henriquez a confirma na NoticiaCla.com diahuebs atardi. Den un otro raportahe, NoticiaCla.com a cita e director di e compania cu lo maneha e parke di molina na Urirama, Henk Hutting, cu a confirma cu 2 siman pasa nan a ricibi e permiso porfin.

HENRIQUEZ NO TA SORPRENDI

“Mi no a keda sorprendi ya cu e gobierno aki cu su maneho fascista y totalitario ta custuma caba di trapa riba derechonan di pueblo y ta bulldoze tur procedura legal pa nan yega na nan meta cu ta sirbi nan interes politico y ta laga interes general un banda” Henriquez a bisa. Segun e presidente di e fundacion, e minister no a sigui ningun procedura legal pa otorga e vergunning, dus nos como Vereniging Salba Urirama ta bai entama un caso atrobe na e miho interes di e pueblo Arubano. “Land Aruba a tuma e decision pa otorga e vergunning apesar (cu) minister no a sigui e procedura legal pa hasi esaki. Como tal, Henriquez, tumando nota di e ultimo desaroyo a bisa cu asina cu e yega di exterior, lo considera e avenida di entama un caso. “

HENK HUTTING TABATA SA

Henk Hutting a sinti caba cu e cos aki ta bai pasa y cu lo bai tuma un procedura largo manera el a expresa pa Noticia Cla” Henrique a sigui bisa. “Pa mi ta cla y raspa, nos lo keda bringa contra e proyecto aki. E ta un proyecto cu no ta sirbi e algemene belang di e pueblo di Aruba” Henriquez a sigui bisa. “E procedura legal no a wordo cumpli cu ne. Nan a hasi mescos biaha pasa. Riba dje nan no a contesta nos bezwaarnan di cual nan mester a contesta dentro di 30 dia despues cu nos a entrega nos bezwaar” Henriquez a finalisa bisando. No ta conoci ki dia e caso lo keda entama.