Minister Paul Croes: Union Sindical ta un desaroyo positivo

ORANJESTAD – Segun minister di labor Paul Croes, e reciente Union Sindical ta un desaroyo positivo. Asina el a bisa NoticiaCla.com diahuebs mainta prome cu el a biaha pa exterior. "Na mas cu un ocasion mi a bisa FTA cu e union sindical lo fortalece e esfuersonan di sindicatonan aki na Aruba” Croes a sigui bisa.

UNION TA POSITIVO PA TUR HENDE

Segun e mandatario, "e union sindical cu a sali afo awo despues di e discusionnan riba e articulo 1613X ta uno positivo pa tur topico cu ta ensera e trahador", Minister di labor drs. Paul Croes a sigui bisa. Tin hopi tema cu ta regarda nos desaroyo economico y laboral cu por wordo discuti ora cu tin union bou di sindicatonan. "Topiconan manera e maneho di prome permiso di trabou, arbowet, leynan laboral, referendum cu ta discusionnan cu diariamente nos ta confronta cu ne, y semper ta miho pa haya un opinion y un vision for di e sector aki. “Anteriormente esaki no tabata e caso. Mi mester a sinta cada biaha cu sindicatonan separa", Croes a mustra. E la bisa cu nan lo traha pa yega na leynan y acuerdonan cu base amplio y cu un solo mensahe. Esaki lo elimina e asunto tambe cu sindicatonan cu no ta participa na dialogo despues ta critica e acuerdonan y of ley y hopi bes uza e echo di no tabata presente pa trece discordia.

FALTA DI CONCENSO ENTRE SINDICATONAN

Entre sindicatonan mes hopi biaha no tin consenso. E meta mester ta union y respet pa otro cu un solo meta pa hiba Aruba dilanti. Basicamente e discusion riba articulo 1613X, a habri caminda pa e union aki. "Den tur e discusion riba e articulo 1613X a sali algo sigur positivo cu ta e union bou di e sindicatonan. Den futuro nos lo ta den dialogo cu un bloque cual lo hasi nos trabounan mas facil. Mi ta mira esaki como un desaroyo positivo” Croes a finalisa bisando.