OM ta desmenti cu sospechoso local a huy den caso di atraco Excelsior Casino

ORANJESTAD - Te awor no tin Arubiano deteni den e caso di atraco di Excelsior Casino. Tampoco ta asina cu tin un persona local como sospechoso, un tal L, y tampoco ta berdad cu e lo a huy. Segun vocero di ministerio publico, nan no tin ningun informacion di esey y e informacion no ta cuadra. Un website di noticia local, (cu no ta NoticiaCla.com), a raporta esey eroneamente segun Angela a bisa NoticiaCla.com diahuebs atardi.

YAMA 911

E informacion di e matutino Diario cu e sospechosonan cu a wordo atrapa diadomingo anochi, mes a yama 911, ta berdad. Sinembargo, Angela ta bisa tambe si cu numa nan a haci esey practicamente na e momento cu polis tabata di actua pa detene nan. “Polis tabata para cla pa detene nan, ora e yamada a drenta” Angela a clarifica. Mientrastanto e ta confirma tambe pues cu no tin ningun Arubiano cu ta deteni den e caso aki. No ta descarta cu mas detencion lo cay den e proximo dia of oranan.