Director DIMAS ta confirma robo laptop cu informacion confidencial

ORANJESTAD – “Enberdad tin un denuncia haci na autoridad policial relaciona cu un robo”. Asina director di DIMAS, Kathy Paskel a confirma na NoticiaCla.com diahuebs merdia. E robo cu e ta referi na dje ta di un tas den cual tabatin laptop y USB stick cu informacion confidencial balioso ariba. “Mi por confirma tambe cu e caso ta den man di autoridad concerni pa atende cu esaki." “E ta un tas di trabou, conteniendo material di trabou, dus e ta mas cu e laptop, si”, Ruiz a confirma bisando.

SACA LAPTOP FOR DI EDIFICIO NO TA INUSUAL

Segun Ruiz, e tas conteniendo e laptop, a wordo horta for di auto di un miembro di personal di DIMAS, ora cu esaki tabata for di trabou. Riba e pregunta cu si ta normal cu un miembro di personal di DIMAS por saca computer/laptop for di edificio di DIMAS, Ruiz a splica cu esaki no ta inusual. “Normalmente trabou ta sosode na e edificio. Pero tin tareanan cu por sosode pafo di ora di trabou. Den e caso aki, esey ta e caso” Ruiz a sigui bisa.

ACCION MESORA TUMA ORA A RAPORTA ROBO

Contrario na informacionnan cu ta circulando, cu ta hopi tempo e caso aki ta conoci y cu a tapa esaki, Ruiz a desmenti. E ta sigura cu e incidente aki a sosode medio october y directamente a tuma tur e pasonan corespondiente pa haci e melding na polis y otro instancianan concerni.

MUCHO TEMPRAN PA SA CONSECUENCIA DI INFO

Mirando cu ta trata di informacionnan confidencial y sensitivo, cu Ruiz a confirma tambe, e ta un asunto interno y como tal no por a duna mucho mas informacion. “Mester duna espacio na autoridad pa haci nan trabou den esaki. Como tal mi no por duna mas informacion cu mi a duna caba”.

Obviamente un caso asina ta delicado, y e por tin consecuencia pa esnan responsabel directamente of indirectamente cu e material horta. Pero segun Ruiz, ora cu duna e melding y cuminsa e caso, ta keda na autoridad pa haci nan trabou, y despues por sa si tin consecuencia pa esnan concerni, incluyendo su persona. “Esey ta mucho prematuro pa bisa. Nos ta warda loke ta sali for di e investigacion” Ruiz a finalisa bisando.