Rijksrecherche a termina investigacion riba morto di Mitch Henriquez

DEN HAAG — Ministerio Publico na Den Haag a ricibi e procesverbaal cu investigacion cu rijksrecherche (recherche di reino) a haci riba e causa di morto di Mitch Henriquez. Asina e vespertino Amigoe di Aruba ta raporta den su edicion di diahuebs. “Den e estado aki, no por pronostica ki dia e resultadonan lo bira publico” e vespertino ta sigui bisa.

CONFIRMACION CU A RICIBI PROCESVERBAAL

“”Nos a ricibi e procesverbaal di rijksrecherche comienso di e siman aki” vocero di OM di Den Haag, Isle de Heer a confirma. "E investigacion awor ta keda awo na huez comisario, pa determina si e investigacion ta suficiente, of si mester haci investigacion adicional”. E hues comisario ta tuma e decision ey durante un asina yama ‘regie zitting’ pero no tin ningun planea ainda. Y un termino den cual esaki por tuma lugar, tampoco por a wordo duna, segun de Heer.

TESTIGO SCUCHA

Rijksrecherche durante e ultimo lunanan a scucha decenas di testigo, riba e morto di Henriquez. E Arubano di 42 aña a keda deteni dia 27 di juni ultimo durante un festival den Zuiderpark na Den Haag, bai flauw, y a fayece un dia despues den hospital. Ministerio Publico a publica anteriormente caba cu Heriquez a fayece a consecuencia di falta di oxigeno, a consecuencia di actuacion di polis. Como tal e cinco agentenan policial cu tabata envolvi den e caso ey, aworaki ta sospechoso.

DISTURBIO

E morto di Henriquez tabata motibo pa protesta cu a desemboca den disturbio den e parti di Schilderswijk na Den Haag. E rabia ‘di pueblo’ tabata mas ainda debi na un ‘fayo garafal’ di Ministerio Publico, cu net despues di e morto, a raporta cu Henriquez ‘lo a bira malo den e bus di polis na caminda pa e warda’. Riba imagen di video di testigonan ocular, tabata hopi cla cu Henriquez tabata fo’i conocimento hopi mas prome e la wordo carga y hiba den e bus di polis.

DISGUSTO

Na Aruba e disgusto tabata grandi tambe, pero no a yega na disturbio. E famia di Henriquez tabata instrumental den esaki door di pidi pa trankilidad pa nan ser. Nan tabata hopi vocal tambe contra violencia na Hulanda. Fuente di e informe aki: Amigoe di Aruba.