Tributo na Carlos Santana un exito total

ORANJESTAD - Diamars anochi na Cas di Cultura a tuma luga e Concierto un Tributo na Carlos Santana. E idea cu a bin di conocido comerciante Ash Hirdaramani cu a acerca Robert Jeand'or pa hunto organisa e concierto aki cu ayudo di reflection band bou mando di Frenk Kock. Ash Hirdaramani cu a demostra ariba guitara electrico tur loke e la siña di su idolo y mentor Carlos Santana cu e anochi aki tabata un copia di e propio Santana.

RUBEN GARCIA

Ruben Garcia cu e tarea pa anima e publico como maestro di ceremonia a haci esaki, den su estilo, animando e sala cu su chiste. El a demostra tambe, cu e tambe ta un fanatico di Santana.

ELENCO MUSICAL

E anochi aki a habri cu e bailarinnan di Lesbel Coco Rico dancers sigui cu presentacion di reflection band y despues cu e All Star Band cu musico nan local e.o Angelo Kock yiu di e conocido Hilward Croes dfm, Ronwayne Kock, Gabriel Ras, Chencho Kelly, Robert Thijzen, Vio Wester, Henry Croes, Robert Dumfries, Frank Kock , Robert Jeand'or, Ashok Hirdaramani y e cantante nan Giovanni Tromp, Marlon Willems y e unico dama Livette Tromp Richardson kende por a duna un presentacion di kita sombre y ariba nivel halto cu a laga e publico presente encanta.

MUSICOAN DI TAYA

Musiconan cu cada uno ariba nan instrument por a demostra con bon nan por a domina e instrument cu pikete sin laga di menciona Robert Thijsen cu a sacudi Cas di Cultura cu su talento ariba drum y Robert J’eandor ariba su baho y Ash cu tabata parse e propio Carlos Santana ariba su guitara electronico.

ENCORE

E anochi aki tabata un anochi fabuloso unda na final hasta publico a pidi pa otra otra y a complace e publico cu un ultimo presentacion.

Tur presente a gosa y na e mes momento a contribui na un bon causa cu lo wordo reparti pronto na Bon Nochi drumi dushi. BOB Aruba y Cas Sjabururi.

GRADICIMENTO

Comision un "Tributo na Carlos Santana" kier gradici tur e sponsernan y na tur cu a contribui di un of otro forma na e anochi exitoso aki. Pueblo di Aruba en general masha masha danki.