Lo cuminsa un era nobo pa cultura y arte na Aruba

ORANJESTAD - Den luna di juni Ministerio di Cultura hunto cu Departamento di Cultura Aruba (DCA) a organisa e Cumbre Nacional di Cultura 2014, unda cu hopi idea y sugerencia fresco a bin dilanti cu lo sa di continua na e plannan nobo cu lo bin dilanti pa eleva e calidad di nos cultura.

E Cumbre Nacional di Cultura 2014 tabata bon bishita cu mas di 250 persona di diferente genero cultural y tambe pa esnan cu ta stima nos cultura, cu a sa di trece nan sugerencia dilanti. Esaki sigur ta yuda pa hunto nos yega riba e plan di implementacion. Den e Cumbre Nacional 12 punto a keda presenta door di DCA, cu a wordo saca despues di analisa tur e informacionnan cu a bin dilanti den e ronda nan di consultacion.

E cumbre aki a fungi pa yega na un maneho integral pa cultura y arte a base di colaboracion, informacion y inspiracion. Asina nos tur por wak den e mesun direccion y traha un fundeshi solido pa e futuro generacion. Esaki lo cuminsa un era nobo pa cultura di arte na Aruba.

DCA ta evaluando riba tur loke a keda presenta y abase di esaki yega na traha un lista di prioridad. E prioridadnan cu a wordo saca for di e analisis tin di haber cu educacion y formacion den arte y di cultura, educacion di historia cultural di nos pais, educacion y formacion den diferente disciplina di Arte, y tambe documenta y digitalisa nos cultura y centralisa e accesibilidad.

Minister di Cultura Sr. Otmar Oduber lo instala un Conseho di Cultura, cu lo carga e tarea principal pa supervisa e implementacion di e maneho integral di cultura.

Tambe lo forma un comision a base di un decreto gubernamental entre Departamento di Cultura Aruba (DCA) y Departamento di Enseñansa (DEA) pa asina aki crea un plan integral pa duna nos cultura y folklore un espacio calve den educacion na Aruba.

Pa Ministerio di Cultura y DCA ta hopi importante pa comunidad completo forma parti di actividadnan cultural, y pa haci esaki posibel lo saca un calendario cultural pa asina brinda informacion di eventonan cultural y haci esaki accesibel pa tur hende.

Ta importante pa como un solo Aruba nos traha hunto pa eleva e calidad di nos cultura, cargando cada un cu e responsabilidad, pa nos cultura keda biba di un generacion pa e otro. E maneho cultural sigur lo sa di reenforsa nos calidad di cultura y arte.