Diferencia di opinion entre WEB y Elmar riba e ultimo blackout!

ORANJESTAD – Cu e reaccion di e compania di utilidad WEB awe riba e declaracion di ELMAR riba e ultimo blackout na Aruba, ta confirma cu tin un diferencia di opinion riba e motibo di blackout. Y cu e comunicado di awe, WEB a admiti cu e risico ey tin aworaki. WEB den su reaccion awe a bisa cu “cu un root cause analysis lo demostra unda e fayo a inicia, cual a conduci na e blackout di dia 23 di october ultimo”.

IMPORTANTE PA HAYA E INICIO DI FAYO

Tambe a sali na cla cu e origen di fayo, mientras cu tin un disputa, tampoco ta mucho cla ainda. Como tal e comunicado ta mustra ademas cu ‘aunke e resultado lo no yuda comunidad mucho awor aki, ta importante pa tanto WEB como ELMAR averigua inicio di e fayo, pa evita ripiticion’. “Mes importante ta pa e companianan ruman WEB y ELMAR comunica efectivamente den situacionnan similar” e comunicado ta sigui bisa.

FORMA DI COMUNICADO DI WEB DURANTE BLACKOUT

Di su banda durante e blackout WEB a trata mas tanto posibel di informa comunidad via radio y nan pagina di Facebook y despues via television, pa tene comunidad na altura di ki tempo por spera coriente bek despues di e blackout. En berdad e prioridad na momento di e blackout tawata pa stabilisa e situacion di coriente mas liher posibel.

ELMAR A INFORMA WEB DI E MOTIBO 

Sinembargo na e momento di e blackout, ta e propio tecniconan di ELMAR a informa WEB di e fayo den nan feeder. WEB ta sigui su comunicado bisando cu e siman aki e investigacion ta keda cla. “Entretanto WEB, ELMAR y Utilities lo reuni pa no trece mas confusion riba e sucedido aki” e comunicado ta finalisa bisando.