Director General di UNESCO a topa cu minister di Aruba y Corsou

PARIS – Durante un reunion colectivo, ministernan di Aruba (Otmar Oduber) y di Corsou (Irene Dick di Enseñansa) entre otro, a topa cu funcionario mas halto den e organisacion di UNESCO, sra Irina Bokova cu ta e director general. E tabata un reunion riba nivel halto unda solamente e mandatarionan por tabata presente.

ESFUERSO DI ARUBA

Den un relato di oficina di minister Oduber, a mustra cu durante e reunion, un biaha mas e esfuersonan di Aruba a keda reconoci pa e forma con nos ta fortalece e relacion di turismo y cultura. Un combinacion unda tur dos aspecto ta den balansa y ta reenforsa otro. Aruba ta tumando un posicion como lider den e ambicionnan di UNESCO.

INVITACION PA ARUBA

Segun e relato, den e ambito aki Oduber por a papia un momento extenso cu Bokova  y  haci e invitacion na e funcionario mas halto di UNESCO pa ta presente na e conferencia di World Tourism Day na Aruba otro aña. Intencion ta pa durante e conferencia no enfoca solamente riba turismo, pero kier a tuma e oportunidad pa demostra e rol importante di cultura den esaki riba un plataforma halto. Kier ilustra e beneficio economico cu turismo ta trece pa cultura y tambe cu cultura ta trece pa turismo. E ta bay pa crea calidad pa tur dos sector unda tur dos ta beneficia di otro.