A detene un di cuater persona den caso atraco Excelsior Casino

ORANJESTAD – Un otro persona a keda deteni diamars anochi relaciona cu e atraco di Excelsior Casino. Awe tardi vocero di ministerio publico Ann Angela a confirma esaki pa NoticiaCla.com. “Mi por bisa bo cu polis a detene un di cuater sospechoso den e investigacion na e atraco riba Casino Excelsior na Holiday Inn”. Segun Angela, ta trata di e muher J.U.L. “ E investigacion ta sigui den full swing. Manera bo sa, a habri un TGO ( Team Grootschalig Onderzoek). Mas detencion no ta wordo exclui” Angela a finalisa bisando.

E DETENCION

E team di polis un rato pasa a logra pone man riba e tres atracadornan di Excelsior casino na Aruba mes. Contrario na un informe cu NoticiaCla.com a cita di e corant Venezolano El Nacional (cu un lo a huy for pa Venezuela caba), tur tres tabata na Aruba ainda. E informacion a keda confirma pa vocero di polis Lito Lacle. Detayes di e detencion no ta conoci ainda. Pero e informacion ta cu e detencion lo a tuma lugar den area di KIA diadomingo anochi. NoticiaCla.com ta felicita e team di polis hunto cu OM cu a pone man riba e trio peligroso aki. 

IDENTIDAD RECONOCI PA OM

E tres personanan cu e unidad special di polis (Mobiele Eenheid) a logra detene laat ayera diadomingo anochi, enberdad ta e tres personanan sospecha di a atraca Excelsior Casino un siman pasa awe. Asina vocero di ministerio publico Ann Angela a sigura NoticiaCla.com dialuna mainta. Mientras cu for di ora e noticia a keda conoci cu a ‘detene’ e tres atracadornan, e pregunta tabata si por a confirma esaki. Segun Angela por confirma cu enberdad ta e tres personanan aki.

SIN PLACA OF ARMA

Ora cu a gara e tres personanan aki diadomingo anochi, nan no tabatin arma of placa den nan poder, segun Angela a bisa. Pa motibonan obvio di seguridad, Angela no por a duna detaye di nan proximo paso, esta ki ora y dia e tres personanan aki tin cu bin dilanti huez comisario. “Nos no kier bisa”, Angela a contesta riba e pregunta ey. Pa aworaki, esey ta e informacion cu por a keda suministra. Angela a bisa si, cu mientras cu e investigacionnan ta siguiendo, no ta exclui mas detencion cu por cay den e proximo ora, dianan nos dilanti. Esaki ta depende di con e interogacionnan ta bay y kico mas e investigacion ta trece dilanti.