Pullmantur ta cancela 18 escala di crucero pa otro aña pa Aruba

ORANJESTAD - Pullmantur ta cancela 18 escala di crucero pa otro aña pa Aruba. E noticia aki a keda confirma diaranson pa oficina di turismo di Aruba. Mas prome caba, miembro di oposicion di partido MEP, Dangui Oduber (no tin relacion cu minister Oduber) a informa di esaki, indicando cu e minister encarga cu turismo Otmar Oduber, no tabata papia berdad ora cu el a menciona un aña record pa turismo otro aña. Segun ATA, cancelacionnan di Pullmantur ta afecta crecemento previsto pa 2016 den nos industria crucero, cual tabata proyecta na un crecemento di 15% compara cu 2015. Awor e crecemento previsto den e cantidad di turista crucero pa 2016 ta proyecta pa 9% cu ta ekivalente na un total di 658,944 turista di crucero pa nos isla.

MOTIBO DI CANCELACION

E linea crucero Pullmantur cu ta forma parti di e grupo di Royal Caribbean Cruises Ltd. (RCCL) ta bishita nos isla for di aña 2012 casi semanalmente cu e barco Monarch. Recien Pullmantur, cu tin su propio maneho dentro di e portofolio di RCCL, a informa diferente socio di cambionan cu ta tumando luga y cu nan lo ta optimalizando nan flota debi cu un di nan barconan crucero (Empress) a ser traspasa bek pa Royal Caribbean International Cruises. E ultimo paso aki tambe tabata un decision repentino pa Pullmantur, kende a ricibi e informacion aki september ultimo.

REDUCCION DI CANTIDAD DI BISHITA

Como tal, Pullmantur a ahusta su programa y planificacion pa 2016. Un di e cambionan ta e reduccion di cantidad di bishitanan di e barco Monarch den su itinerario di Sur di Caribe. Monarch awo a wordo re-dirigi pa opera den e region Baltico pa zomer 2016. Esaki ta un mercado importante pa e compania Spaño Pullmantur cu antes tabata wordo cubri pa e crucero Empress. Manera ta conoci, Pullmantur ta un compania Spaño, pues e compania ta sigura cu e base di su operacionnan eynan ta sigura.

CAMBIONAN AFECTA

E cambio menciona ta afecta tur e destinonan den e itinerario manera Panama, Cartagena, Corsou y tambe Aruba. Esaki lo ta entre e fechanan di 1 di juni 2016 te cu 28 di september 2016 y ta representa aproximadamente 36,000 pasahero. Originalmente e linea crucero Pullmantur lo a bishita nos isla cu 58 ‘calls’ cual awo a bira 40 ‘calls’, un reduccion di 18 calls en total.

INTERVENCION DI MINISTER ODUBER

Inmediatamente despues di a ricibi e informacion aki, tanto Minister di Turismo, Otmar Oduber y Aruba Tourism Authority a tuma contacto cu CEO y presidente di Pullmantur Jorge Vilchez como tambe cu Federico Gonzalez Denton di Royal Caribbean Cruises Ltd., kende tabata na Aruba 22 di oktober ultimo durante e ‘Cruise Symposium Aruba’ durante cual ainda e informacion aki no tabata conoci. A papia riba retonan cu Pullmantur ta pasando aden na e momentonan aki, incluyendo e impacto di un mercado manera Brazil cu ta pasando den problemanan awor. Retonan den trafico for di Sur America, primordialmente den e mercado di Brazil, combina cu e necesidad pa sigura ‘calls’ den e area primario pa e compania cu ta inclui e area Baltico a pone cu Pullmantur a tuma e decision inespera aki.

DANGUI ODUBER RIBA E ASUNTO

E parlamentario pa partido MEP, Dangui Oduber, cu ta ocupa su mes riba e tereno aki y ta e contrincante continuo di Oduber riba e tereno aki, anteriormente a alerta pa e informacion aki. “Nos ta lamenta cu un biaha mas minister Otmar Oduber a gaña nos y nos pueblo encuanto turismo crusero” (Dangiu) Oduber a bisa NoticiaCla.com diaranson anochi. “Segun e minister otro aña lo ta un aña record pa turismo crusero” e parlamentario a sigui bisa. Sinembargo segun (Dangui) Oduber, na aña 2014 e compania Pullmantur a cancela tur su barconan crusero pa Aruba durante e zomer ey. “Teniendo esaki na cuenta nos a puntra e minister si esaki no lo bolbe pasa na aña 2016. Su contesta tawata cu no, nan a reconfirma tur cos y Pullmantours lo t'ey den zomer di aña 2016” (Dangui) Oduber a sigui bisa. Pero informacion cu Oduber a ricibi tambe, tabata anticipa e cancelacion manera cu ATA a menciona den un comunicado mas laat riba diaranson, dunando Oduber rason. “ Un noticia hopi malo pa nos pais y nos ta spera cu Otmar Oduber por duna claridad riba esaki y splica pakico e la bolbe gaña nos!” Dangui Oduber a bisa. Den e comunicado di minister Oduber, e ta duna e splicacion.