Zenitel a bende su red Caribense cu Curacao Growth Fund

WILLEMSTAD - Zenitel N.V. (EURONEXT Brussels: ZENT), conoci pa ta un di e miho companianan den comunicacion sigur y integra, a anuncia siman pasa cu el a firma un "share sale agreement" cu Curacao Growth Fund pa bende 100% di su accionnan den Zenitel Caribbean B.V.

OPERACION DI ZENITEL

Situa riba islanan Caribense y cu su oficina principal na Corsou, Zenitel Caribbean ta doño y ta opera e red di comunicacion via radio di autoridadnan na Corsou, Aruba, Sint Maarten y e islanan BES, esta Boneiro, Sint Eustatius y Saba. E compania ta operado di un red y ta bende "airtime" for di su propio red di comunicacion. Adicional, e ta bende productonan di Vingtor-Stentofon y ta actua como un integrado di sistema.

JUSTUS MARTENS DI CURACAO GROWTH FUND

Justus Martens, Gerente General di Curacao Growth Fund a bisa di ta masha contento cu e acuerdo aki: "E compania ta brinda servicio di calidad y a sa di crece constantemente den e ultimo 10 añanan y nos ta masha contento di anuncia cu esaki ta bira e prome inversion di Curacao Growth Fund, estableci recientemente na Corsou. Como doño nobo, nos ta comprometi di sigui e trend positivo impone dor di e compania internacional Zenitel Group y nos lo sostene e ekipo di gerencia den forma strategico y 'hands-on'. Siendo un doño local, nos ta convenci di lo añadi balor na e strategia regional di crecemento di e compania".

GERENTE DI ZENITEL

CEO di Zenitel, Kenneth Dastol a comenta cu e transaccion ta cuadra cu e strategia di Zenitel pa stop cu nan operacion y maneho di red di comunicacion y pa enfoca mas den e crecemento di nan negoshi rendabel di benta di productonan di Vingtor-Stentofon. El a splica cu durante e discusionnan cu Curacao Growth Fund, a bira cla cu e compania nobo ta compronde e necesidadnan di e compania local y como doñonan local, nan ta bon staciona pa añadi balor na e compania, na e clientenan y na e empleadonan. El a agrega di ta contento cu, como parti di e acuerdo, Curacao Growth Fund lo bira un miembro di e Zenitel's World-Wide Partner Network y lo mercadea y bende productonan di Vingtor-Stentofon rond di Caribe y partinan di Latino America. “Tanto gerencia como empleadonan ta masha contento cu e cambio den accionistanan, specialmente pasobra ta un compania local, esta Curacao Growth Fund. Nos ta convenci cu esaki tin beneficio so pa nos operacion den Caribe, enfocando riba crecemento den region y inovacion di nos productonan”, asina Bert Schreuders, gerente general di Zenitel Caribbean a duna di conoce.

KEN CURACAO GROWTH FUND TA

Curacao Growth Fund ta e prome "Private Equity Fund" na Corsou y ta estableci dor di Justus Martens y Erik Baas, dos specialista den "private equity" cu mas di 50 aña di experencia internacional den banco, financiamento corporativo, accounting, maneho corporativo y maneho di inversion. E fondo lo conta cu inversionnan for di fondonan di pensioen, banconan y companianan di seguro na Corsou. Ta bon pa bisa cu e prome y e inversionista mas grandi te awo ta Algemeen Pensioenfonds Curacao (APC). E mision di e fondo ta pa inverti den companianan existente y bon estableci, pa desaroya nan y hiba nan na crecemento den añanan, basa riba inyeccion di capital adicional y di sosten strategico y continuo di nan ekipo di maneho.