A kita e top di e faro di 100 aña bieu

ORANJESTAD – Diaranson tabata un dia hopi special y historico caminda cu e top di e faro di 100 aña bieu a keda removi. For di mainta trempan a cuminsa cu e trabounan pa kita e top cu ayudo di e compania Amast NV su kraan, Ecoline Aruba cu ta e contratista encarga cu e proyecto di restauracion por a prepara e top y kita esaki for di riba e Faro.

E PROYECTO

Manera ta conoci, na principio di september Stichting Monumentenfonds Aruba (SMFA) a anuncia cu lo inicia cu e proyecto di restauracion di e California Lighthouse. Mientras cu e preparacionnan tabata tuma lugar y no tabata mira hopi cambio hopi hende ta puntra ki dia e trabounan ta cuminsa. Pa algun siman caba e compania encarga cu e proyecto cual ta Ecoline Aruba a cuminsa cu e trabounan parti di paden y pafo caminda por a mira cambionan chikito.

ULTIMO CUIDADO DI E FARO

SMFA tabata presente pa presencia e momento special aki y tambe a invita Sr Romulo Fingal cu ta yiu di e ultimo cuidador di e faro y cu tin un cariño special pa e monumento aki hunto cu su yiunan. Tambe tabata presente Monumentenbureau cu ta e lider di proyecto , IMD Aruba como e architecto y Ecoline Aruba cu ta e compania encarga cu e trabounan di restauracion. Despues di awe e trabounan di restauracion lo sigui na e Faro mes y e top lo bai pa restauracion. Mientrastanto e lampi mes a keda kita caba y lo ta instala riba un construccion temporal pa por sigui hasi su funcion durante e periodo di restauracion.

DURACION DI E PROYECTO

Ful e proceso a keda bon documenta igual cu tur e proceso di restauracion di e California Lighthouse cu lo ta documenta pa asina esaki por keda tambe pa futuro generacionnan. E proyecto lo tin un duracion di aproximadamente 7 luna mas y ora e ta cla lo keda habri pa publico por disfruta di e bunita bista di ariba.