Fecha pa elimina visa pa Colombianonan drenta Aruba ta conoci

ORANJESTAD – Informacion cu NoticiaCla.com tin, ta cu pa 2 di december proximo, e visa pa Colombianonan drenta Aruba, ta vence. Esey ta nifica de facto cu pa e fecha ey, Colombianonan no mester di visa mas pa drenta nos isla. For di fuentenan, NoticiaCla.com a ricibi e informacion aki, aunke ainda for di oficina di gobierno mes ta papiando di dos fecha, esta 2 y 3 di december. E no ta mucho cla cua di dos e lo bira, pero for di informacionnan cu NoticiaCla.com a logra haya, ta mustra cu e fecha ta dia 2 di december 2015. Ningun instancia di gobierno tabata por y kier a confirma e fecha exacto y a referi nos na minister, cu no tabata disponibel pa comentario. Hecho ta, cu e fecha ta stipula. 

ANUNCIO DI PRESIDENTE COLOMBIANO

Na fin di october ainda gobernantenan na Aruba no tabata sigur ainda (por lo menos segun nan declaracion na prensa) ki fecha ta elimina e visa pa Colombianonan bishita Aruba, presidente Colombiano Juan Manuel Santos si a confirma cu 3 di december proximo, Colombianonan por drenta Europa sin visa. Esaki ta inclui Hulanda tambe. Esey ta nifica cu na december e lo firma e acuerdo pa eliminacion di e rekisito. E ta nifica cu ciudadanonan Colombiano por drenta tur pais di Union Europeo.

AYUDO ITALIANO

Santos a ricibi e presidente di conseho di ministro Italiano Matteo Renzi, y a confirma cu e eliminacion di e visa, Colombianonan por drenta e 26 paisnan miembro. Italia su importancia ta pasobra ta netamente nan a sostene e plan pa Union Europeo elimina e visa ‘antipatico’, manera nan ta wordo yama. E lo firma e acuerdo na Bruselas na december  despues cu e asisti e cumbre mundial na Paris riba medio ambiente. E siman aki e ultimo decision a wordo tuma, y awor falta e firma. Dialuna ultimo conseho di minister di Union Europeo a autorisa e firma di acuerdo cu e gobierno di Colombia riba e kitamento di e visa. Ta spera cu prome cu pasco e acuerdo keda firma, pa un dia despues e drenta na vigor caba.

TEMPO DI AHUSTE

Tin un tempo previo di e firma, cu ta pone cu e aerolineanan, aduana, y autoridad na e varios puntonan di entrada por adopta e medidanan necesario pa agilisa e ingreso di e Colombianonan cu ta biaha pa e 26 paisnan Schengen, pa e periodo di duracion corto te cu 90 dia. Como rekisito, e ciudadanonan mester tin un pasaporte cu mester tin un validez di minimo tres luna despues di e fecha di regreso, un pasashi ida y buelta, un reserva di hotel, of invitacion di un amigo of familiar. E paisnan cu ta permiti e entrada di e Colombianonan, ta bira Alemania, Austria, Belgica, Dinamarca, Slovakia, Slovenia, Spaña, Estonia, Finlandia, Francia, Suecia, Republica Checo, Hungria, Italia, Leetonia, Lithuania, Luxemburgo, Malta, Hulanda, Polonia, Portugal, Grecia y cuatro no miembro de la UE: Suiza, Noruega, Islandia y Liechtenstein.

ARUBA SU POSICION RIBA VISA PA COLOMBIANO

Eliminacion di visa pa Colombianonan bishita Aruba, no ta sosode aworaki. Por lo menos, no segun informacion cu prome minister Mike Eman tin. E ta reacciona asina riba pregunta di NoticiaCla.com, cu tin informacion cu posiblemente fin di luna aki, e visa lo por a wordo elimina caba pa Colombianonan. Mas cu e por a bisa, ta cu e tambe a tende e ‘rumornan aki’, pero no via un canal oficial. E informacion cu e tin, ta cu mas sigur fin di aña, esaki lo sosode.

PALABRACION CU KOENDERS

Segun e mandatario a splica NoticiaCla.com, tin un palabracion haci cu minister di relacionnan exterior Hulandes Bert Koenders, cu ora cu e decision pa elimina e visa aki wordo ehecuta dor di Schengen (paisnan europeo y islanan BESS), e momento ey tambe Aruba lo haci esaki simultaneamente. NOTA: E potret ta di presidente Colombiano Juan Manuel Santos cu prome minister di Italia Matteo Renzi na fin di october ora cu e desicion a wordo participa na Colombia.