Bermudez: Ta spera e siman aki pa aproba tasa pa introduci ABB

ORANJESTAD – Ainda no tin nada riba confirmacion di e tasa di e Algemene Bestedings Belasting (ABB), segun Minister di finanza Angel Bermudez. E ley mes ta cla, pero e tasa ainda falta. Tin cu haci cierto evaluacionnan cu tin cu tuma lugar pa keda cla. “Mi ta spera cu e siman aki, berdaderamente nos por yega na un conclusion di henter ehercicio aki y cu enberdad nos por bisa esaki ta e porcentahenan cu nos ta bay cuminsa cu ne ora cu e proposicionnan wordo aproba den parlamento” Bermudez a bisa.

NO POR LOS INFORMACION

Problema cu e mandatario no por ‘los informacion ainda’ segun e mes ta splica, ta cu e tin cu duna su conseho di minister prome e informacion. “Mi ta responde prome na nan” Bermudez a recorda NoticiaCla.com. Y esey no a sosode ainda, esta e palabracion y mas importante ainda, e aprobacion di e plannan pa e reformacion. “Tanten cu esey no sosode, mi no por duna ningun porcentahe riba su mes, pasobra e ta bay bira un bida riba su mes, mientras cu no tin ningun decision riba esaki ainda” Bermudez a bisa. E mandatario a siña cu den e ‘circo politico’ bo no por confirma nada concreto tanten cu e no ta concretisa. “Si ta pami, e por ta e siman aki, pero e por ta otro siman tambe” Bermudez a finalisa bisando.

ABB SU IMPACTO

E reforma fiscal menciona, mester wordo implementa entrante 1 di januari 2016, cu ta nifica un cambio basta grandi di e sistema di impuesto. Entre otro lo elimina impuestonan manera BBO/BAZV, y mucho mas. Y na su lugar ta bin un cantidad di otro cos, mas facil, y miho structura y menos complica pa atende cu ne segun e mandatario. Pero e problema ta cu pa por tin un sistema fiscal mas facil, tin cu sigura cu e simplificacion aki ta cubri un area grandi di departamento, y cu tur esaki ta wordo cubri y cobra di un forma husto. Un ehercicio cu a resulta di no ta nada facil.