Situacion di Venezolanonan a ‘trigger’ adaptacion ley di admision

ORANJESTAD –Manera previamente informa pa NoticiaCla.com, gobierno a anuncia oficialmente e prome serie di cambio di admision pa turista. Den combersacion cu e directora di DIMAS Kathy Ruiz Paskel, e ta admiti cu mientras cu e cambio ta conta pa tur hende, e situacion alarmante di Venezolanonan a ‘trigger’ esaki. Ruiz a splica tambe cu tin mas cambio na caminda cu lo keda anuncia dentro di poco. Tur e cambionan actual a drenta na vigor entrante 1 di november ultimo.

CARTA DI MINISTER

E carta cu a sali di parti di minister (lesa e carta aki), ta informa cu e condicionnan pa extension di un estadia di turista a wordo ‘adapta’. Na entrada, IASA (imigracion) ta otorga e persona un estadia pa un cierto cantidad di dia. Ey ta informa cu trahamento riba e isla, durante e estadia turistico, no ta permiti. Y si kier extende esaki mester cumpli cu un cantidad di condicionnan y ta valido pa un maximo di 90 dia den e mesun aña calendario. Excepcion ta pa esnan cu tin propiedad na Aruba.

MAS CONTROL Y SANCION 

Entre e cambionan aplica, ta e maneho di multa pa un persona cu drenta Aruba como turista, pero cu ta wordo haya ta traha, sin cu e tin e permisonan necesario. NoticiaCla.com a nota cu mientras cu ta papia di multa, e informacion di gobierno no ta specifica cuanto esaki a aumenta. Un cambio anuncia tambe ta cu si gara un persona asina, ta kita su permiso di turista y ta deporte mesora.

WARDA PERMISO DEN EXTERIOR

Den combersacion cu e directora di DIMAS, el a confirma cu den caso di un prome peticion pa un permiso pa estadia temporal, e persona en cuestion mester warda e permiso aki den exterior. E ta un regla, segun Ruiz, cu tabata existi caba y cu no a wordo ateni na dje pa varios motibo, pero cu awor a dicidi di enforza esaki atrobe cu tur forza di ley. (lesa e reglanan nobo aki)