Segun Plasterk, ‘politiek Den Haag’ satisfecho cu Aruba

ORANJESTAD – E minister Hulandes cu tin e responsabilidad di Reino Hulandes, Ronald Plasterk ta impresiona cu e forma con Aruba ta maneha su situacion dificil, despues cu e.o. Valero a sera su porta. E asina yama “Politiek Den Haag” ta contento, segun e mandatario. “Mi tin un respet pa e forma con gobierno, no obstante e sla (di ciere di refineria) a purba via otro camina manera turismo y e perfil berde, sali pa dilanti y purba di haci lo mihor. “Impresionante”, Plasterk a bisa NoticiaCla.com. E mandatario tabata di bishita na Aruba dialuna pa un dia, unda cu el a papia cu prensa na final di su bishita diamars mainta. 

ARTICULO TELEGRAAF

Riba e articulo di e corant Hulandes Telegraaf cu a keda publica den weekend y cu ta papia di ‘e pandiya di Mike Eman’, unda cu varios di e mandatarionan ta wordo acusa di ta meti den algo illegal of negativo, e mandatario hulandes no tabatin mucho comentario. Basicamente pasobra e mes ta pasa den cosnan asina. “Mi sa lesa noticianan den corantnan Antiano riba Hulanda, unda cu mi ta pensa cu ‘esey no ta completamente berdad’. Pues tin cu tum'e pa loke e ta, indicando cu no tur cos cu wordo poni, semper ta berdad y lague te eynan, sin dun'e mas balor.