Cachonan di KIA y douane a pasa control di calidad hulandes exitosamente

ORANJESTAD – Tanto e cachonan specialisa di douane y husticia (CEA/KIA) como nan manehadornan a pasa den un control di calidad di Hulanda diamars mainta. E control di calidad a wordo efectua pa Hans Hulzinga, entrenador specialisa pa cacho di douane hulandes na Schiphol. A haci uso di material prepara na Hulanda pa e control aki. E obhetonan, manera stickers, rietjes, y paña di cosmetica a wordo prepara specialmente pa e test di calidad aki, na Hulanda, cu holo di droga, arma, bala cayente y placa. Como tal por a test e cachonan riba e holo di heroina di Pakistan, neder-wiet, MDMA, Afetamine, placa Euro y balanan (di arma di candela) uza.

PRUEBA CU EXITO

Tanto e cachonan di douane como di husticia a pasa e prueba aki cu exito. De hecho, Hulzinga tabata impresiona cu e nivel y calidad di e cachonan local. Banda di e control di calidad aki, a bira un hecho cu entrenamento conhunto di tanto douane como husticia ta miho. Asina nan ta fortifica otro y ta siña tambe di otro.