Bankeronan ilegal a usa supermercadonan como front

ORANJESTAD – Recherche Samenwerkings Team (RST) a tuma mas di 900.000 florin y un arma di candela den beslag cerca bankeronan ilegal e siman aki. Dos dia despues cu e accion a tuma lugar, e detayenan a bira conoci publicamente. Segun ministerio publico, RST a tuma den e anochi di prome di november 2015, na tres diferente sitio un suma di placa cash hopi grandi den beslag y varios arma (entre nan, un arma di candela). E placa a wordo haya cerca personanan cu ta wordo sospecha di ta bankeronan ilegal y di ta envolvi den asina yama “underground banking”.

ACCION

E accion, cu tabata bao guia di Ministerio Publico di Aruba, ta relaciona cu un investigacion local cu tin algun luna andando. A tene inval na tres diferente sitio. RST (Recherche Samenwerkingsteam), hunto cu Cuerpo Policial Aruba, FIOD (Fiscale Inlichtingen en Opsporingsdienst) y Koninklijke Marechaussee, a tene inval den un cas na Bushiri y dos supermercado (Harmony) na Santa Helenastraat y Uconvenience Store den Caya Ritmo, di cual ta wordo sospecha cu nan tabata fungi como cover pa underground banking. Ora a ristra na e sitionan aki, a haya e placa y armanan.

DETENCION Y PLACA

Na momento cu a traha e relato di prensa aki, e stand van zaken tabata cu ta trata di un suma di mas cu 900.000 florin den varios valuta. A detene cuatro sospechoso, dos homber di 36 y 47 aña, y dos muher di 36 y 39 aña. Nan ta wordo sospecha di tabata meti den underground banking y posiblemente den labamento di placa. Tur cuatro a keda den detencion. A cuminza un investigacion di siguimento na e procedencia di e placa.