Plasterk: Situacion cu Venezolanonan na Aruba ta hopi serio

ORANJESTAD – E situacion di Venezolanonan na Aruba tin atencion di minister Hulandes Ronald Plasterk. Den un combersacion awe mainta cu NoticiaCla.com prome cu su salida pa Corsou, e mandatario a admiti cu e la constata cu ‘e isla ta seriamente preocupa’ cu e situacion. Reunionnan cu el a tene cu tur gremio y gobernantenan a confirma su punto, segun e mandatario a splica NoticiaCla.com. E mandatario a confirma tambe cu un carta a sali di Aruba di premier Mike Eman, pa colega minister Bert Koenders, cu e puntonan di preocupacion. “De hecho esey ta e canal cu mester atende esaki”.

PROBLEMA POTENCIAL SERIO

Plasterk a mustra cu durante su combersacionnan cu el a sostene cu varios gremio y persona, e la constata cu e preocupacion ta grandi y cu ‘e ta un potencial problema serio’. “Mi lo manda e mensahe pa mi colega Koenders cu mi observacion ta cu potencialmente esaki ta un cuestion hopi serio”. E ta conciente tambe cu Venezuela ta nos bisiña di mas grandi y esey tin cu tene na cuenta. E mandatario a experencia tambe pues cu ciudadanonan na Aruba ta hopi preocupa. “Y mi ta sinti cu mi mester transmiti e preocupacionnan bek na Hulanda” Plasterk a priminti. Kico lo sali di e carta y e preocupacion y den kico esaki por traduci, no ta conoci. Cualkier posibilidad di un visa, no a haya oido serca e mandatario.