Bermudez: Gobierno sigur tin suficiente placa pa fin di aña 2015

ORANJESTAD – E situacion di likidez di gobierno ta bon. “Gobierno tin sigur bastante likides den placa” ta loke minister di finanza Angel Bermudez a sigura NoticiaCla.com. E motibo ta simpel tambe: “Dos siman pasa nos a haya e ultimo tanda di e fiansa di e aña aki, cu ta mas di 40 miyon dollar for di institutonan financiero caminda cu nos a haci e fiansa e aña aki” Bermudez a bisa. “E ta cubri en todo caso e ultimo lunanan aki di 2015”. Pues e mandatario ta sigura cu no tin problema cu cash flow.

KEHO HOTELERO CU GOBIERNO TA MAL PAGADO

E pregunta a surgi entre otro basa riba informacion cu NoticiaCla.com a ricibi recientemente, unda cu e sector hotelero no ta haci negoshi cu gobierno mas, si no ta riba base cash. E no ta na altura cu comerciantenan, primordialmente den sector hotelero, no ta haci negoshi mas gobierno, si no ta a base di cash, debi na e status di mal pagado cu gobierno tin. “Gobierno pa añas tin e regla cu e ta paga su facturanan, despues di 90 dia."

RECLAMO SI RIBA PAGO VS VERREKENING DI DEBE

Enberdad tin reclamo di cierto comerciante y sector hotelero riba pagonan di gobierno cu ta wordo compensa cu cierto debe cu e comerciantenan aki tin cu departamento di impuesto. Y si comerciantenan ta opta pa no haci negoshi cu gobierno, ta nan pleno derecho. Asina e mandatario di finanzas Angel Bermudez a sigura NoticiaCla.com.   E mandatario a mustra cu e tabatin reunion dos biaha cu representantenan di AHATA y no a tende nada di esey, esta cu no kier haci negoshi pa falta di placa.