Motibonan politico a pone Eman frena Bermudez den reforma number di auto

ORANJESTAD –“ Mi no ta un politico, pero mi ta actuando den un circo politico si. Y mi tin cu tene cuenta cu e ambiente politico” Asina e mandatario di finanza Angel Bermudez ta splica NoticiaCla.com riba e ‘metemento repentino’ di colega minister Mike Eman riba e plan pa implementa e cambio riba pago di number via accijns. E prome mandatario recientemente a declara cu no ta asina asina ta bay implementa e ley, sino mas bien cu e ta bay cana un otro trayecto, prome cu pensa mes pa introduci esaki. Y esaki tin un motibo netamente politico, ya cu e por afecta un grupo grandi di persona, y posiblemente e prome mandatario tin miedo cu e tin efecto negativo politicamente.

MAS EHERCICIO PA SALVAGUARDIA CIERTO GRUPO

E mandatario di finanza a admiti cu durante su presentacion recientemente di e plan di cambio di pago di number di auto, den conseho di minister a bin cierto preguntanan pa haci cierto ehercicionan adicional. Muy en especial pa algun grupo den nos comunidad cu kizas lo encontra algun exceso (di pago) den e reforma cu a keda proponi. E ehercicionan aki ta wordo haci e momentonan aki pa e departamentonan concerni. “Asina cu nan tin e resultadonan pami, e ora nos lo informa e hunta di minister atrobe y pa asina mi por logra haya un decision definitivo” Bermudez a bisa. Tanten cu esey no ta e situacion, ta keda evalua y mantene e situacion asina te ora cu e cos ta algo definitivo.

CORTAMENTO DI HALA DI MINISTER

E mandatario no ta sinti cu su halanan a wordo corta y cu por tin e impresion cu e ta na ‘merced’ di prome minister pa e por actua den e caso specifico aki. “No, ami ta trece dilanti un proposicion basa riba pensamentonan di efectividad y eficasio cu ami ta gusta tene na djele. Pero naturalmente e politiconan tin biaha ta evalua aspectonan politico cu cierto cambionan por tin. Esey ta pone cu nan ta pidimi cierto momento pa haci un ehercicio riba cierto aspecto pa asina nan tambe tin e siguransa cu e aspectonan ey politicamente tambe ta cubri” e mandatario a bisa. E tin tur respet pa esey, pasobra ta nan ta e politiconan y ta nan ta esnan cu a wordo eligi. “Y ami ta yuda mi ta yuda aki den nan pa cierto proposicionnan wordo realisa” Bermudez a bisa. Riba e pregunta si e no ta ‘frustrante’ traha asina, e mandatario a bisa: “No. Mi a bisa cu fo'i cuminsamento mi a bisa cu mi ta duna un man y tanten cu ami tin e impresion y sintimento cu loke mi kier haci y loke mi ta haci ta na bienestar di comunidad aki, y cu mi no ta wordo stroba den un sentido cu mi trabou ta envano, mi ta sigui haci mi trabou. Y sigur bo tin cu tene cuenta cu e otronan”. Aki e mandatario a admiti cu no ta un one man show y cu e no tin tur cos pa bisa. E tin cu realisa cu politiconan ta manda y cu traha cu esey.

TRANCA PROCESO

E realidad ta, cu e proceso asina ta wordo tranca y ta algo tambe cu Bermudez ta admiti y ta realisa. “Esey tambe mi a custumbra cu ne, cu e molinanan di gobierno y gobernacion ta draai hopi mas poco poco cu e molinanan di biento”. Bermudez a finalisa bisando. Cu miras riba e tardansa y cu e problema cu e por causa na oficina di belasting, e ta agilisando e ehercicionan den speransa cu e siman aki nan keda cla pa un decision por wordo tuma lihe y cu e por keda cla cu oficina di impuesto.