Bermudez: Encuentro menos tenso cu Plasterk e biaha aki

ORANJESTAD – E encuentro entre ministernan Ronald Plasterk y Angel Bermudez tabatin menos tension cu prome, y de hecho e ultimo a consider'e como un ameno. Como parti di e bishita relampago di e mandatario Hulandes, Plasterk a topa cu e minister di finanza di Aruba. Pero e topico di finanzas publico no a wordo discuti. “Unico punto di agenda tabata e Fondo di Desaroyo di Aruba (FDA)”, Bermudez a sigura NoticiaCla.com dialuna atardi. Y e motibo ta simpel segun e mandatario. Bermudez su cartera ta finanza y Plasterk ta relacionnan di Reino, pues no finanza. Algo cu por wordo discuti den seno politico. Y segun Bermudez, p'esey e topico no tabata riba agenda.

MENOS TENSO

Segun e mandatario di finanza, ta su di dos encuentro cu Plasterk na Aruba (ultimo biaha tabata na mei). “Mi tin cu bisa cu e biaha aki e esfera tabata menos tenso y hopi mas ameno. Esey tambe a sali na cla tambe” Bermudez a bisa. E combersacion su duracion tabata un indicacion di dje. “Den casi mey ora nos tabata cla cu henter e agenda, cu tabata riba FDA y e ora nan a sigui cu nan programa y ami a sigui cu mi trabou”.

SITUACION POLITICO DIFERENTE

Bermudez ta kere cu e situacion politico a cambia awor cu tin un comprondemento riba e situacion financiero. “Esey a trece politicamente naturalmente basta tension. E esfera tabatin e efecto riba e encuentronan cu nos tabatin”. Ora cu a puntra e mandatario si e relacion financiero entre Aruba y Hulanda ta bon, e mandatario a bisa cu tanten cu e sa, Aruba no tin relacion financiero cu Hulanda. Tampoco e supervision, pasobra segun Bermudez, aunke cu ta Hulanda a sugeri pa e colegio di supervision, esaki ta cu e colegio supervision CAFT y no cu gobierno Hulandes. Aki e mandatario ta insisti cu Hulanda no tin nada di haber cu e situacion financiero di Aruba, ni su control. NOTA: Foto di archivo di NoticiaCla.com durante momentonan di tension na mei ultimo ora cu Bermudez a topa Plasterk ultimo biaha.