Bermudez: Si mester, ta pidi mas tempo pa keda cla cu presupuesto

ORANJESTAD – E fecha di 15 di november poni como ‘deadline’ pa parlamento ricibi presupuesto 2016 di pais Aruba ta ‘realisabel’ segun Minister di Finanza Angel Bermudez a sigura NoticiaCla.com dialuna. Pero si mester di mas tempo pa por keda cla cu e presupuesto su tratamento, lo pidi mas tempo. E mandatario ta bon conciente tambe cu basa riba e ley di Laft aproba na augustus, e presupuesto 2016 mester ta aproba mas tarda 15 di december di e aña aki.

TRAYECTO

E trayecto di e presupuesto ta canando su caminda y e mandatario ta premira cu e siman aki mas tarda, e contenido (di e presupuesto) por wordo aproba den conseho di minister, pa despues mande pa Staten. E presupuesto a wordo manda pa tanto Raad van Advies y e colegio di supervision financiero di Aruba esta CAFT. CAFT mientrastanto a reacciona caba y entrega gobierno nan conseho riba esaki for di siman pasa. Aworaki ta na gobierno pa evalua con pa procesa e consehonan den e presupuesto aki.

CONSEHONAN CAFT

E consehonan di CAFT pa cu e presupuesto no tabata ‘out of this world’ segun e mandatario a bisa NoticiaCla.com. “Nan ta mas bien ambivalente. Di un banda nan ta recomenda cierto substancialidad den entrada manera cu nos a calcula. Di otro banda nan ta conseha pa tin cierto prueba di maneho di dominio den e gastonan y muy particular di personal. Nos tur sa cu e ta cubri mitar di nos presupuesto” Bermudez a sigui bisa. El a mustra cu gobierno a traha for di aña pasa riba e causanan di e subida autonomo di gasto di personal, y kier y ta purbando di cambia esaki den un forma di maneho y control.

CAMBIONAN SUGERI PA CAFT

E cambionan cu CAFT ta pidi, no ta ambicioso, sino nan percepcion nan ta conseha y conclui cierto adaptacionnan. “Y manera mi a bisa semper, gobierno tin un responsabilidad unico den esaki, pasobra finalmente e ta dicidi pasobra e ta ehecuta e presupuesto”, Bermudez a finalisa bisando. For di inicio di e introduccion di e colegio di supervision anterior y esun actual, tabatin un 'diferencia' di opinion entre con e partidonan (gobierno vs CAFT/CFT) ta mira e cambionan y consehonan, y con tin cu interpreta nan. E colegio di supervision semper ta haya un tinte 'conservativo' mientras cu gobierno ta mira e situacion cu un otro wowo, cu no tur ora ta bay cu e pensamento di CAFT (y hopi biaha tambe despues gobierno Hulandes y di Reino). Unabes cu e presupuesto keda presenta na parlamento, lo por mira cuanto di e consehonan di CAFT ta visibel den e presupuesto, y mas importante, si e ta carga 'aprobacion' di CAFT. E realidad, cu gobierno ta disputa hopi biaha, ta cu si CAFT no ta conforme cu e contenido, e tin e posibilidad di conseha gobierno di Reino, cu na su turno tin e derecho di actua segun instrumentonan na su poder segun palabracion haci cu e propio gobierno, basa riba e protocol firma 2 di mei 2015 entre e dos partidonan.