Preparando pa One Cool Summer Nationals

ORANJESTAD - E trabaonan di preparacion ta andando tanto localmente como tambe internationalmente pa un di e caredanan di drag mas grandi cu ta wordo celebra anualmente aki na Aruba, esta One Cool Summer Nationals. E aña aki e evento ta programa pa tuma lugar dianan 29, 30 y 31 di Augustus y lo conta un biaha mas cu participacion international y e mihonan di Aruba tambe ta den full preparacion pa asina duna un tremendo show durante di e weekend aki. Den cuadro di preparacionan pa e gran careda aki The Boss Racing Foundation kier a invita tur donjo y drivernan di Pro Bike pa un reunion Diaranson awor 2 di July na Centro Deportivo Betico Croes pa 7or di anochi. Ya caba den simanan tras di lomba a tuma lugar un reunion hopi fructifero cu e donjo y drivernan di e brommernan Crioyo Outlaw y por cuminsa na bisa cu pa e caredanan di One Cool Summer e publico lo por bai disfruta di un show cu un field completo di no menos cu 16 brommer Crioyo Outlaw batayando heads up contra di otro. Awo ta toca turno pa sinta cu esnan encarga cu Pro Bike como cu mester scucha tambe e necesidad di coredornan como cu nan ta esnan cu ta inverti hopi placa pa asina pone un show pa e publico,y trahando hunto na tempo por pone cu na final tur esnan envolvi por disfruta di un tremendo careda. Pues Diaranson awor pa 7or di anochi ta warda e donjonan y drivernan di Pro Bike pa 7or di anochi na e porta di hero bandi pazuid di Centro Deportivo Betico Croes pabao di Top FM na Santa Crus pa un reunion na caminda pa One Cool Summer 2014.