Minister Plasterk a cuminsa bishita na Aruba

ORANJESTAD – E bishita di un dia di minister hulandes Ronald Plasterk a inicia awe mainta tempran cu varios reunion. E mandatario a bin Aruba pa un dia, durante cual e lo reuni cu varios mandatario, gremionan tanto comercial como sindical, y tambe lidernan di algun fraccion. Riba e potret por mira momento awe mainta cu minister di husticia Arthur Dowers a topa cu e mandatario ora cu Plasterk a yega pa su reunion cu minister Mike Eman y despues Angel Bermudez.

META DI BISHITA

E meta principal ta pa papia entre otro riba e situacion financiero di gobierno, terminacion di Fondo Desaroyo Aruba, eventual reapertura di e refineria. Combersacionan lo ta entre otro cu gobernador di Aruba, Prome Minister y Minister di Finanzas. E biaha aki tambe lo topa cu representantenan di camara di comercio, gremionan sindical y comercial. E bishita na Aruba lo ta di apenas un dia, pa despues e mandatario sigui pa Corsow e siguiente dia.