Formalmente ministerio publico a confirma identidad di atracadornan

ORANJESTAD – E tres personanan cu e unidad special di polis (Mobiele Eenheid) a logra detene laat ayera nochi, enberdad ta e tres personanan sospecha di a atraca Excelsior Casino un siman pasa awe. Asina vocero di ministerio publico Ann Angela a sigura NoticiaCla.com dialuna mainta. Mientras cu for di ora e noticia a keda conoci cu a ‘detene’ e tres atracadornan, e pregunta tabata si por a confirma esaki. Segun Angela por confirma cu enberdad ta e tres personanan aki.

SIN PLACA OF ARMA

Ora cu a gara e tres personanan aki ayera nochi, nan no tabatin arma of placa den nan poder, segun Angela a bisa. Pa motibonan obvio di seguridad, Angela no por a duna detaye di nan proximo paso, esta ki ora y dia e tres personanan aki tin cu bin dilanti huez comisario. “Nos no kier bisa”, Angela a contesta riba e pregunta ey. Pa aworaki, esey ta e informacion cu por a keda suministra. Angela a bisa si, cu mientras cu e investigacionnan ta siguiendo, no ta exclui mas detencion cu por cay den e proximo ora, dianan nos dilanti. Esaki ta depende di con e interogacionnan ta bay y kico mas e investigacion ta trece dilanti.

DETENCION

E team di polis diadomingo anochi a logra pone man riba e tres atracadornan di Excelsior casino na Aruba mes. Contrario na un informe cu NoticiaCla.com a cita di e corant Venezolano El Nacional (cu un lo a huy for pa Venezuela caba), tur tres tabata na Aruba ainda. E informacion a keda confirma pa vocero di polis Lito Lacle. Detayes di e detencion no ta conoci ainda. Pero e informacion ta cu e detencion lo a tuma lugar den area di KIA diadomingo anochi. 

IDENTIFICACION ATRACADORNAN 

Fuera di atracador Carlos José Huerta Ibarra (30) di Maracaibo, e nombernan di e otro dos persona tambe ta conoci y publica pa Guerrero. Nan ta Víctor Manuel Valente Albornoz, (24) tambe di Maracaibo, estado Zulia. Loke no ta menciona ta e nomber di e persona local, cu na Venezuela ta wordo identifica como ‘un Hulandes’. Hunto cu e nombernan, ta bin e ‘historial criminal’ cu ta mustra cu nan ta hendenan conoci pa husticia Venezolano. Entre otro Valente, a wordo huzga na Maracaibo pa un delito no menciona, y a dun'e un medida ‘cautular’. Huerta Ibarra a wordo condena na 2009 pa cual e mester a raporta na corte Venezolano cada 30 dia. Mas informacion ta mustra cu tur tres a prepara e robo aki, unda cu Valente lo a biaha pa Aruba un dia prome cu e robo, y e otro, Ibarra, a biaha pa Aruba 4 dia prome. Ambos a biaha cu e aerolinea Laser. E suma cu ta wordo menciona di robo, ta di un miyon dollar y un suma ‘no determina’ den florin.NoticiaCla.com ta felicita e team di polis hunto cu OM cu a pone man riba e trio peligroso aki.