Goeloe: Aki dos siman por divulga nomber di director nobo di hospital

ORANJESTAD – Dentro di dos siman e proceso pa nombracion di un director nobo di hospital mester ta cla. E presidente di Raad van Toezicht di hospital Gino Goeloe a confirma esaki pa NoticiaCla.com den fin di siman. Tin dos persona actualmente cu ta ‘den contienda’, di cual uno ta un medico y e otro no y ambos ta persona local y ambos ta biba den exterior. Mientras cu algun nomber a circula recientemente di un persona local, Goeloe no tabata cla pa duna e nomber ey. Simplemente pasobra si despues resulta cu no ta e persona ey, e lo no tabata algo corecto.

DOS PERSONA ANTERIOR

Goeloe a confirma cu inicialmente tabatin dos persona cu a keda te na e final di e proceso anterior, un Hulandes biba na Surnam y un Curasoleño biba na Hulanda, pero ora a yega na e punto di referencia, a nota cu e dos personanan no tabata loke cu RvT tabata buscando, y a laga nan dos cay. E ora a bay bek na e lista di aplicados y for di esey, a bin cu e dos nombernan cu ta den contienda aworaki.

NEGOSACION

Actualmente ta den e parti di ‘negoshacion’ pa loke ta e candidatonan y e parti di condicionnan di trabou. Riba e termino aki ta papiando cu e dos personanan aki. NoticiaCla.com a compronde mientrastanto cu un di e candidatonan ta residencia na Costa Rica y ta actualmente den e fase di negoshacion di condicion di trabou. Si yega na otro cu e persona aki of e otro, lo menciona e nomber mesora di e persona cu haya e funcion.

BON MANAGER

Loke cu RvT ta buscando ta un persona cu ta un bon manager cu experiencia amplio. E persona cu ta wordo busca pa e funcion, ta uno persona dinamico, inovativo, cu e pasion pa cuida hende, y tambe pa e personal. Tambe e mester tin e conocemento di maneho. “E no mester ta ‘necesariamente’ un medico."