El Nacional: Un atracador di Excelsior Casino a huy caba pa Venezuela

CARACAS/ORANJESTAD – Un di e atracadornan di Excelsior Casino di 22 di october ultimo, a huy mesun dia di e atraco, bek pa Venezuela, y e otro ainda ta permanece na Aruba. No ta conoci cua di nan ta esun cu ainda ta na Aruba y cua a move caba. Tur esaki segun e periodista di e corant Venezolano respeta El Nacional, y e periodista Sandra Guerrero. E informacion lo ta cuadra cu informacion di fuentenan di interpol na Venezuela, cu cual autoridad di Aruba ta trahando hopi di cerca. De hecho, autoridad di Aruba mesora ora cu e atraco a sosode, a pidi ayudo di Interpol su oficina na Venezuela pa intercambio di informacion. Mientras cu varios tabata e medionan di prensa sea cybernetico of otro forma, cu tabata los disparate un tras di otro, e corant El Nacional ta un di e poconan cu tin e credibilidad halto y cu ta respeta den e pais. Como tal su informacion ta mas confiabel y ta usa fuentenan semper confirma. 

IDENTIFICACION ATRACADORNAN

Fuera di atracador Carlos José Huerta Ibarra (30) di Maracaibo, e nombernan di e otro dos persona tambe ta conoci y publica pa Guerrero. Nan ta Víctor Manuel Valente Albornoz, (24) tambe di Maracaibo, estado Zulia. Loke no ta menciona ta e nomber di e persona local, cu na Venezuela ta wordo identifica como ‘un Hulandes’. Hunto cu e nombernan, ta bin e ‘historial criminal’ cu ta mustra cu nan ta hendenan conoci pa husticia Venezolano. Entre otro Valente, a wordo huzga na Maracaibo pa un delito no menciona, y a dun'e un medida ‘cautular’. Huerta Ibarra a wordo condena na 2009 pa cual e mester a raporta na corte Venezolano cada 30 dia. Mas informacion ta mustra cu tur tres a prepara e robo aki, unda cu Valente lo a biaha pa Aruba un dia prome cu e robo, y e otro, Ibarra, a biaha pa Aruba 4 dia prome. Ambos a biaha cu e aerolinea Laser. E suma cu ta wordo menciona pa e periodista, ta di un miyon dollar y un suma ‘no determina’ den florin.

INTERPOL

Mas detayes divulga mas probable pa Interpol, ta informacion conoci caba, esta cu a mara e 4 personanan cu nan a haya den e casino, cu tie-wrap, y agredi nan cu e cabo di e arma di candela. E hecho cu a reconoce nan for di comienso como Venezolano, tabata basa riba testimonio di esnan cu a wordo mara, cu a identifica e accento como ‘Venezolano’.