Hopi accidente di trafico pa motibo di alcohol excesivo

ORANJESTAD – E fin di siman cu a pasa a keda tipifica pa buracheria den trafico, causando un sin fin di accidente. Dos di e accidentenan tabata riba diadomingo cu a laga varios bario sin coriente den oranan di mainta. Manera cu NoticiaCla a raporta caba den fin di siman, polis cu un team grandi a tene accion riba e dos dianan specifico, unda cu a enfoca riba velocidad halto y uso di alcohol. No obstante e controlnan aki, a resulta cu otro automobilistanan toch no a capta e mensahe y a sigui cu nan patronchi di core bou di influencia.

AUTONAN DESTRUI

Hopi tabata e autonan cu a keda destrui, mayoria di nan pa mal maneho di nan chauffeurnan oficialmente registra pa polis como 'bou di influencia’. Loke tabata interesante durante e control di polis den fin di siman, tabata e forma con e automobilistanan tabata purba sali for di nan situacion pa nan no keda deteni. E limite tabata 250 ug, cu ta e midi poni pa por bebe. Hopi, sino ta mayoria a surpasa esaki bay, y tabata insisti cu ta ‘algun drinks’ nan a bebe. Esaki siendo cu polis por a hole e alcohol riba nan for di momento cu nan tabata baha for di e auto. Den e control por lo menos 22 persona a haya nan mes den boei, y trai trali, y pa hopi, sin por core auto pa basta tempo. 

CONTROL DI WEEKEND

Manera cu NoticiaCla.com a raporta caba, durante un control grandi riba uso di alcohol y velocidad di auto, -un team di 26 polis total-, entre diabierna anochi y diasabra marduga a logra detene por lo menos 22 automobilista pa motibo cu nan tabata bou di influencia. E control tabata organisa door di unidad di motor, coleganan di warda di Santa Cruz, Noord, y di scol di polis.

CONTROL

Durante un periodo di mas of menos 6 ora di tempo, e team grandi aki, parti riba varios parti strategico di Aruba cubriendo Noord y Sta Cruz, (ruta unda cu tabatin mas hopi bar y trafico), e team aki a sa di controla no menos cu 300 auto, detene 22 persona (nan a supla y surpasa e limite legal di alcohol), y a kita rijbewijs di 12 automobilista. Durante e control aki, polis a kita auto tambe di varios hende pasobra nan a bebe ‘net riba grens (di ta bebi). NoticiaCla.com a compronde di esnan encarga di e control, cu e controlnan lo sigui mas frecuente, di e grandura aki, pa tene nos trafico sigur. “Specialmente awor cu fin di aña 2015 ta yegando”.