Task force di salud cu programa pa diabeticonan na Aruba den november

ORANJESTAD – Cu casi 8.000 hende diabetico registra na Aruba, cu ta traduci na casi 4 miyon na gasto medico pa AZV, un taskforce ta trahando pa concientisa nos comunidad pa reduci e cifra aki y haya sa cuando persona mas por ta diabetico. Den e luna di november e task force ‘promocion di salud’ (DESPA, IBISA, IMSAN, WGK, AZV, SVB y HOH) lo dedica full e luna na e tema aki. “Dia 14 di november ta dia mundial di diabetisch” Sonia Kappel di Departamento di Salud a bisa. Durante un conferencia recien, nan a divulga tur nan plannan pa e luna aki.

REGISTRO LOCAL DI DIABETICO

Mientras cu Aruba tin ‘apenas’ 8000 persona registra cu ta diabetico, mundialmente e cifra ta na mas di 600 miyon hende cu ta diabetico. Di e grupo aki 400 miyon no ta logra scapa di dje. “Esey ta haci cu e tema aki riba agenda mundial tambe, y nos tambe ta para keto riba esaki” Kappel a bisa. E lema cu e taskforce a usa, ta “Bida ta dushi”. E ta den dos sentido, unda cu e por ta dushi di sucu, pero tambe cu bo ta aprecia bida. Esnan cu ta diabetico, ta conciente di e risiconan cu nan tin pa biba. Nan ta e grupo di persona cu ta compronde cu nan ta core mucho mas riesgo pa muri di malesa mas trempan. Un di nan ta atake di curason of stroke.

BUS DI SALUD

E luna lo ta yena cu actividad riba e tema aki. Diferente partners di e plataforma lo haci actividad y canalisa esaki tambe. Den e caso aki IBISA ta lidera e cantidad di actividad. E bus di salud lo ta den bario pa tur hende tin oportunidad pa check bo risico. Lo e bus ta na diferente supermercado. Dia 9 di november e bus lo ta na SAFE A LOT na San Nicolas for di 12-7pm, 10 di november na SUPERFOOD, diaranson na SUPERCHONG Savaneta, atrobe 12-7pm. Riba 12 di november nan lo ta na Ling & Sons y 13 di november na SUPERCENTER na San Nicolas.

SUPERMARKET TOURS

Den e mesun tempo cu e bus di salud ta na e supermercadonan, entre 10 pa 12 lo tin supermarket tours pa e diabetico y of esnan familiar cu ta cushina pa nan. Esaki ta ensera cu e dietistanan di varios departamento (HOH, IMSAN, IBISA) lo ta presente pa asisti cu haci compras pa un persona diabetico. Nan lo siña entre otro con pa lesa un etiketa, con pa haci e compras pa e lifestyle nobo ta tuma lugar. Lo tin cu inscribi na IBISA na e telefon 5824987 pa haci e reservacion, pasobra sin reservacion no por participa pasobra e cuponan ta limita. Banda di esey, tin 14 di november un posibilidad pa prik di 8-11am, pa check sucu.