Tur tres atracado di Excelsior Casino ta conoci

ORANJESTAD - Despues cu awe tardi polis a identifica un di e tres atracadornan di e atraco riba Excelsior Casino dialuna, y manda e potret di e persona pa prensa, NoticiaCla.com a pone man riba e potret di tur tres atracador, pero sin nomber. E potretnan ta saca ora cu e personanan a drenta e casino, for di porta di dilanti. Dos tin petchi bisti, uno tin un chivo, uno ta cara limpi y uno tin loke ta parce un barba. Mas informacion NoticiaCla.com no tin, pero ta confirma cu esaki ta e tres atracadornan. Si cualkier persona por mira e personanan aki, ta pidi pa notifica autoridad mesora na sea e tiplijn 11141 of e number 5273243. 

ATRACADO IDENTIFICA

Tabata mas tempran cu polis a logra identifica por lo menos un di e tres atracadornan di e casino Excelsior. Awe tardi Cuerpo Policial a informa lo siguiente relaciona cu e caso di atraco di Excelsior Casino. Durante e investigacion a logra determina cu tres persona masculino di habla Spaño ta e personanan cu a comete e atraco arma riba e Casino. A resulta cu e atracadornan a bai cu un suma considerabel di placa for di e sitio. E investigacion preliminar a duna como resultado cu e atracadornan lo a haci uso di entre otro un vehiculo di e marca Hyundai I10 color shinishi cu e matricula V-2565. E vehiculo en cuestion a wordo laga atras den e vecindario di Rooi Santo.

IDENTIFICACION ATRACADOR

Haciendo investigacion riba e vehiculo aki a resulta cu e vehiculo ta registra riba e persona: Carlos Jose Huerta Ibarra, naci na 21 september 1981, Venezuela.  Ainda e team di investigacion no por confirma cu exactitud e identidad di e otro dos atracadornan. Cuerpo Policial ta gradici e pueblo Arubano pa cu e cooperacion di e pueblo di Aruba pa cu tur e informacionan cu a drenta den e ultimo dianan aki.

NO ACTUA BO SO

Cuerpo Policial kier notifica pueblo cu si acaso nan por tin cualkier informacion riba e suceso pa no actua riba nan mes y pase inmediatamente pa Cuerpo Policial. E personanan aki ta sumamente peligroso y no ta descarta cu nan por tin arma di candela riba nan. Encarecidamente Cuerpo Policial ta pidi Pueblo pa si por tin cualkier tip of informacion riba e sucedido aki pa tuma contacto cu e Tiplijn di polis na e number 11141 of tambe riba e number 5273243.