Pa cada liter bendi na pomp di Valero, 3 cent ta bai pa Cruz Cora

SAN NICOLAS – Valero tin como su compromiso pa ta un bon bisiña den nos comunidad. Pa luna di november Valero Marketing & Supply Aruba N.V. a lansa su campaña anual di gasolin na tur stacion di gasolin di Valero. Cuminsando for di 1 di november 2015 te 30 di november 2015, pa cada liter di gasolin cu wordo bendi, 3 cent ta wordo duna na Cruz Cora Aruba. E campaña aki ta un sosten masha grandi pa e fundacion pa asina por sigui opera y yuda Aruba den momentonan di necesidad. Durante e conferencia di prensa representante di Valero Marketing & Supply Aruba N.V., Sr. Sergio Schwengle, a hiba palabra. ‘Nos a cuminsa cu e campaña di gasolin na aña 2005 y desde e tempo ey nos a bira un partner importante pa Cruz Cora. Aña pasa Valero a logra recauda e suma substancial di Afl. 140.000,- cu a yuda e fundacion realisa trabounan valioso pa nos comunidad,’ tabata palabranan di Sr. Schwengle. E aña aki Valero un biaha mas ta dedica e campaña na Cruz Cora pa asina sostene e fundacion den proyectonan grandi encuanto prome auxilio durante calamidadnan. Valero ta hopi contento y orguyoso di por aporta na Cruz Cora pa tanto aña caba y ta spera cu lo haya e respaldo di pueblo un biaha mas pa asina yuda Cruz Cora grandemente. E campaña ta valido na tur stacionnan di Valero te dia 30 di november 2015. Sr. Michel la Haye, director di Cruz Cora Aruba, ta sumamente contento cu un biaha mas por ricibi sosten for di Valero Marketing pa por yuda realisa proyectonan cu lo beneficia comunidad den momentonan di necesidad. ‘Cu ayudo di tur e clientenan di Valero nos ta keda haya e oportunidad pa mehora hopi bida. Asina ta no lubida di yena bo tanki na cualkier stacion di Valero.’ Sr. La Haye a añadi. Por ultimo Valero Marketing y Cruz Cora ta pidi pueblo di Aruba pa uni na e campaña aki di gasolin di Valero. Tank bo auto na un stacion di Valero den luna di november y bo ta duna un man na Cruz Cora di Aruba.