Renaissance Marketplace cla pa celebra Halloween diasabra cu henter famia

ORANJESTAD-- E aña aki un bes mas e famia grandi di Renaissance ta presenta un tremendo actividad di Halloween pa henter famia. Renaissance Marketplace no ta chansa ora cu nan organisa nan eventonan y Halloween no ta un excepcion. Diasabra awor cuminsando for di 6’or di atardi pa 9’or di anochi e restaurantnan, tiendanan y The Cinemas na Renaissance Marketplace ta presenta un fiesta di Halloween “Trick or Treat” pa nos muchanan. Renaissance Marketplace lo keda completamente transforma den e tema di Halloween lo tin diferente personahe cu lo ta canando rond y lo tin un photo booth caminda por saca potret y warda esaki como un recuerdo di e evento. Famia completo por bin disfruta di diferente actividad cu lo ser presenta diasbra awor manera: zumba pa mucha presenta pa Dwayne Wever y Step It Up Crew, show di baile di The Popcorn dancers, dino jump, carousel, trampoline, pintamento di cara, obra di man, cotton candy oranje, popcorn oranje y mucho mas. E popular Trick or Treat no por keda afo, y tur mucha ta invita pa pasa busca nan cos dushi y regalo na tur e establecimentonan di Renaissance Marketplace. Pa participa, muchanan mester pasa registra cerca un di e “fairynan” (hadanan) na e centro di informacion na Marketplace y den un grupo grandi e muchanan lo bay dal nan ronchi hunto pa busca nan treat. Inscripcion ta completamente gratis y muchanan di tur edad ta invita pa participa. Tambe lo tin un competencia di disfraz y lo tin premio pa e disfraz di mas creativo, mas espantoso y mas cute. E premio nan lo ta entre otro un weekend stay na Renaissance Aruba Resort and Casinos, gift certificates di Renaissance Mall & Marketplace, movie tickets di The Cinemas, gift card di Cilo City Lounge y mucho mas “Henter pueblo di Aruba ta keda cordialmente invita pa bin celebra Halloween na Renaissance Marketplace."