Hopi misterio den dunamento di informacion riba atraco Excelsior Casino

ORANJESTAD – Tin un misterio y confusion den e caso di e atraco di dialuna ultimo di Excelsior Casino. Y e misterio y confusion aki ta den e forma con ta andando cu e suministracion di informacion. Na inicio di e caso, prensa a wordo manda pa papia cu vocero di Ministerio Publico riba e caso. Pero vocero di OM a mustra cu e no tin informacion y cu e no ta esun apunta. Despues a bira conoci cu polis mes lo a duna informacion. Y pa dos dia polis tabata suministra informacion. No hopi, pero nan tabata duna algo.

CAMBIO ATROBE

Awe mainta sinembargo atrobe polis a informa NoticiaCla.com cu entrante awe, vocero di Ministerio Publico ta tuma e encargo over di relata riba e suseso. Problema sinembargo tabata cu vocero di ministerio publico Ann Angela a informa cu e no ta na altura di esaki. “Mi ta desea di informa bo, pero no ta na nos ainda”, Angela a sigura NoticiaCla.com. Pues tin un bay bin formal den e dunamento di informacion.

INFORMACION FOR DI VENEZUELA

Mes momento tin periodistanan di suseso na Venezuela ta los informacion completo di nomber di e posibel sospechosonan, aunke cu NoticiaCla.com no por a confirma esaki. Esey ta pasobra e mesun periodista ey, Jenny Oropeza, a informa tambe cu Prome Minister di Aruba lo a prohibi entrada y salida na Venezolanonan pa Aruba. Pues e grado di confiabilidad, no ta halto eynan. For di su coresponsalnan Venezolano, NoticiaCla.com a compronde cu Oropeza ta un periodista di suseso y cu e tin un grupo grandi di siguidornan. 

PALABRACION

NoticiaCla.com a compronde cu e ‘palabracion’ ta cu te na detencion di e sospechosonan, ta KPA ta informa. “Esey semper tabata asina, aki, na Corsou y Hulanda. Unabes tin detencion, nos ta neem over y e ora mi ta cuminsa” Angela a sigui bisa. E ta admiti cu e asunto ta uno confuso y ta spera cu e asunto lo keda clarifica. Mientrastanto, for di diamars no tabatin ningun informacion local mas, mientras cu internacionalmente varios ta e informacionan (aunke no confirma) cu ta saliendo. NOTA: Foto ta di  archivo di NoticiaCla.com di e caso di atraco di dialuna.