Renaissance Island ta 'back in business'

ORANJESTAD - No tabatin ningun daño personal, ni tampoco na e bestianan eyriba, debi na e forma rapido cu e empleadonan a activa y preveni expansion di e candela, cu a kima e restaurant di Renaissance Island por completo diahuebs mainta. E isla ta pertenece na e hotel, como cu nan no tin un beach. E restaurant a kima por completo diahuebs mainta.

CAUSA DI CANDELA

Mesora su tras, mientras cu ta investigando causa di e candela, un grupo a start cu e preparacion pa renoba e infrastructura riba e isla, pa garantisa continuacion. Mesun diahuebs atardi gerencia a anuncia cu e isla ta "back in business".

RECONSTRUI INFRASTRUCTURA

A ruim op e restonan di e candela y ta cla pa reconstrui un infrastructura mas grandi y miho riba e isla pa adultonan. Mientrastanto a habri un bar nobo y a laga instala BBQ pitnan pa por prepara BBQ, Hamburger, Hot dog, saladanan y tur locual tin riba e menu. Cu esey turistanan por disfruta di e beach, di e tennis court, servicio di masashi, fitness center y por come y bebe locual nan kier.

FLAMINGO BEACH

Diahuebs merdia caba a habri un di e dos beachnan pa publico mientras cu durante oranan di atardi a keda cla cu e otro beach, cu ta habri diabierna mainta 7’or pa e prome huespednan cu subi e isla. Renaissance Island ta conoci pa su adult only beach y su family beach.

TRAHADONAN TA UNI

Di acuerdo cu e tradicion di Renaissance Resort, ora algo asina sosode ta haci cu empleadonan ta bini hunto y ta pone mannan na obra pa crea algo mas grandi, mas bunita y mas espectacular, pa por sigui cumpli cu e demanda di e huespednan di e hotel. Cu e isla funcionando bek, ta demostra e compromiso serio di Renaissance Resort den sigui inverti pa por ofrece un bon producto turistico na tur nan huespednan.

CONSTELACION DI RENAISSANCE ISLAND

Renaissance Island ta pertenece na Renaissance Aruba Resort & Casino. Nan ta 35 empleado cu ta traha riba e isla for di 7or di mainta te cu 7or di anochi. Den e grupo di hotel y casino, nan ta cera 750 empleado.