Oduber: Mehoracion di control entrada Aruba na aeropuerto

ORANJESTAD – Gobierno di Aruba a cuminsa anuncia mehoracion den control na entrada di Aruba den cuadro di e fenomeno di turistanan cu ta bini Aruba pa bay bek Venezuela cu dollars. Un di e ministernan haciendo esaki ta esun di turismo y transporte Otmar Oduber, anunciando entre otro medidanan na aeropuerto. Nan ta varia entre inversion di machine extra di E-gates, carchinan di imigracion pa yena, te na prescreening prome cu sali p.e. for di Venezuela pa drenta Aruba.

CAMBIO DI GATES

Pa loke ta e parti di e-gates, awor na parti di yegada lo tin 6 enves di 2, y 2 na e parti no Mericano y 2 na e parti Mericano. E machinan aki lo agiliza e proceso di tur e personanan cu tin un paspoort cu chip mientras cu e ta baha e presion di nos imigracion. Tambe lo bin cu 12 machine di APC, e machinan cu ta controla paspoort na imigracion Mericano. Na e momentonan aki tin 10 y lo yega te na 22.

CAMBIO DI CARCHINAN DI TURISTA

Un otro cambio cu lo tuma lugar ta e carchinan cu ta wordo yena ora turistanan yega Aruba pa entrega na imigracion, esakinan lo wordo elimina y e proceso lo bira uno electronico. ATA ta trahando hopi di cerca cu imigracion y ta un proyecto cu ta practicamente cla. Oduber ta calcula cu den periodo di un aña cu inicia e proyecto piloto, lo por bay completamente over manera e sistema Mericano unda cu adelanta ta aplica y ta wordo prescreen prome cu haya acuerdo pa bin Aruba. E mandatario ta di opinion cu e proceso aki lo bay yuda cu e fenomeno cu tin na e momentonan aki cu algun di e personanan cu ta bin for di Venezuela mirando cu adelanta por aproba of desaproba yegada di un turista na Aruba.

INVERSION DEN PLOEG DI ATA

ATA a inverti casi mey miyon den e programa y un ploeg grandi di ATA y aeropuerto ta sosteniendo imigracion, departamento pa cual Minister Otmar Oduber tabatin hopi elogio pa nan pasenshi y e cantidad di trabou cu nan tin ultimamente.

RESTRUCTURACION DI AREA DI IMIGRACION

E mandatario a bisa tambe cu pa prome cuartal di otro aña lo bay tin un inversion grandi den restructuracion di henter e area di imigracion. Aeropuerto di Aruba lo bay cambia tur e boothnan y haci e logistica uno mas facil pa tanto usuario como pa esnan cu mester duna e servicio. Igualmente henter e area di douane lo wordo renova y inversionnan lo wordo haci den ekiponan moderno di scanning. Minister Oduber a papia caba cu ATA y aeropuerto pa yuda douane mirando cu e fluho a bira uno hopi grandi mientras cu e cantidad di personal no a sigui crece na e nivel di usuarionan.