Fraccion AVP: Minimalisa risico turista Venezolano cu ta bin Aruba pa 'swipe'

ORANJESTAD- Fraccion di AVP a manda yama ministernan Arthur Dowers y minister Benny Sevinger pa contesta pregunta den parlamento riba e situacion di Venezolanonan cu ta swipe y ta crea problema. Segun presidente di e comision fiho di turismo Jennifer Arends-Reyes, ‘mester minimalisa e risico di e turista Venezolano cu ta bin Aruba pa 'swipe’. ' Den cuadro di esey pues, y den nomber di fraccion Arends-Reyes y Desiree de Sousa Croes di comision fiho di Husticia a solicita e presencia di e dos mandatarionan den parlamento.

REUNION DI URGENCIA

Den un reunion di urgencia e comisionnan di parlamento ta desea di scucha di ministernan kico ta e accionnan cu a ser tuma y kico ta e plannan den termino corto y den termino largo. Di parti di Minister di Turismo siman pasa hunto cu ATA a discuti ampliamente ariba e topico.

BIN CU UN SOLUCION

Segun Reyes y Croes, ta sumamente importante pa bin cu un solucion pa e casonan indesea cu ta pasa na Aruba pa motibo di un grupo di bishitantenan principalmente for di pais bisiña Venezuela cu ta bin cu otro meta Aruba. Cada pais tin nan leynan y cada bishitante mester por keda den e margen di esakinan na momento cu nan ta den exterior y Aruba no ta un excepcion. E parlamentario ta sigui bisa cu hopi Arubiano tin famia y/of amigo na Venezuela y ta mira con e habitantenan di un pais asina bunita y cu hopi recurso natural, ta pasa malo. Pa desesperacion hopi ta bin Aruba pa raspa, bende loke nan por bende of asta horta pa tene nan cabes riba awa. Y e ultimo aki si no ta algo cu Aruba ta conosi p'e. Como ser humano nos por compronde nan situacion, pero como isla chikito nos sa cu nos no por carga e peso cu e exodus di Venezuela ta significa.

TA MONITOR SITUACION

Desde basta tempo ta monitor e situacion y desde algun luna pasa a ripara cu e grupo di bishitante procedente di Venezuela a cuminsa subi poco poco, pero ultimamente casi no por drenta un caya of pasa banda di caminda sin cu ta mira personanan ta cana cu maleta ta bai di un lugar pa otro. Un bista no comun pa Aruba. Tambe fraccion di AVP ta tende mas y mas preocupacion for di comunidad: iritacion pa cu e situacion y hasta miedo. Y esey ta inaceptabel. Fraccion di AVP ta spera cu den e reunion urgente, y despues e otro reunionnan cu entre otro Taskforce, VDA y polis ki cifra tin, si berdad criminalidad a subi, ki tipo di acto criminal por señala, pero mas importante con lo bai soluciona e situacion mas rapido posibel cu cooperacion di comunidad. Y ki campaña di concientisacion lo tin pa descurasha cooperacion di localnan na practicanan ilegal. Venezuela ta nos di dos mercado mas grandi turistico cu ta contribui na mas o menos un 550 miyon florin anual na nos economia y no mester generalisa, pero nos pais ta conoci pa su seguridad y trankilidad y cu dialogo y cooperacion mester yega na solucionnan pa cada preocupacion cu ta biba den nos comunidad.