Croes: Desicion a cay cu no ta elimina articulo 1613X mas

ORANJESTAD - E ley laboral 1613x no ta wordo elimina mas. Den un forma di primicia, Minister di Labor, Paul Croes a informa NoticiaCla.com diahuebs merdia cu despues di un reunion cu fraccion di AVP awe merdia, a dicidi cu ta manda e discusion aki bek pa mesa, unda cu lo discuti tur otro alternativa, enbes di elimina e parti di e ley aki. De hecho, lo purba amplia e ley, enbes di elimina esaki awor. E mandatario kier logra pa e ora tanto su ideanan (logra trabou pa hobennan y 50-plussers) como salvaguardia trabou pa e forza laboral manera cu gruponan sindical a boga p'e. E fraccion berde a convence e mandatario cu e draagvlak actual lo no ta suficiente y cu mester re-evalua e situacion aki. Como tal a sugeri pa manda e ley bek pa mesa pa busca mas alternativa y asina amplia e draagvlak aki tambe. 

META

"Meta di mi como Minister di Labor ta pa crea posibilidad pa hobenan desempleo (22.8%), 50-plussers (1350 persona), hendenan den Bijstand (2500 persona), y uitzendkrachten (1300) por haya un oportunidad pa haya un empleo. Fraccion di AVP a propone un tussenweg entre eliminacion of no di e articulo. Fraccion di AVP a propone n'ami pues un ampliacion di dicho articulo" e mandatario a bisa. 

BEK NA MESA

Lo bai bek na mesa no solamente cu FTA, pero cu tur sindicatonan envolvi. Segun e mandatario, manera semper gobierno aki, a kere y ta sigui kere den dialogo. " For di e dialogo cu lo continua lo yega na un proposicion unda e meta di mi como Minister ta "mas participacion y e proteccion di e trahador riba e mercado laboral", Croes a bisa. Y e meta di FTA pa mantene e articulo 1613X vigente ta keda, unda ambos meta por wordo logra.