Croes: Nunca no tabatin periodo di gracia pa parkeer ‘gratis’

ORANJESTAD – No tin periodo di gracia pa parkeer den zona di parkeermeter. Cualkier confusion a keda desbarata pa director di Arubus, compania madre di Aruparking esta Teo Croes e siman aki. Si tabatin cualkier impresion of ‘gracia’, esey tabata meramente un ‘suavidad’ na comienso di e introduccion, pero no cu ta un ‘regla’ of ‘acuerdo’ cu tin structura. Tampoco ora cu un persona su tempo inicial caba y e kier alarga esaki. “Eynan tampoco no tin un tempo di gracia (di 15 minuut), pa por alarga e ora” Croes a bisa. Simplemente tin cu paga, ora cu un hende uza e area, y tambe prome cu su tempo inicial a vence (si e kier alarga esaki). Asina tabatin mas cos cu e director a aclarea. 

INCERTIDUMBRE

Pa varios siman tabatin un incertidumbre riba e asunto di 15 minuut prome y despues, ya cu tabatin diferente version circulando. Esey a crea un problema pa varios hende cu a bay tras di e ‘informacionnan’ eroneo aki. Nan a kere cu si un persona por a haci un diligencia di e.o. baha y subi carga sin mas, e por a para menos cu 15 minuut sin paga pa parkeer. Esaki ta solamente valido pa truck di carga, cu tin un permiso special pa haci esaki. Un permiso di 150 florin mensual. Pero ningun otro persona por haci esaki.

USO DI PARKEERMETER TE CU AWOR

Un otro informacion cu a wordo comparti, ta e cantidad di usuario ta usando e servicio di parkeer. Mientras cu na cifra financiero esaki no ta disponibel ainda, Croes por a confirma si cu te cu awor, tin 20.000 biaha cu hende a ‘usa’ e machine cu ta nifica cu nan a parkeer 20.000 biaha. Y pa siman, esaki ta aumentando cu 1000 ‘swipe’. Financieramente sinembargo ta keda pendiente pa wak si esaki ta algo bon, of si e ta bou di e margen cu a proyecta pa sigura cu e compania por cumpli cu su meta di genera suficiente placa te pa e por yuda financia Arubus.