Resentimento pa Venezolano riba nos isla ta creciendo

ORANJESTAD – E resentimento pa venezolanonan riba nos isla ta creciendo. Gran parti ta pa e inseguridad cu e Arubianonan ta sinti awor, y e forma con cierto grupo di Venezolano ta actuando. Prueba di esaki ta porta e documento cu ta circulando cu e intento pa colecta firma pa urgi pa bin cu visa pa Venezolanonan (wak e peticion aki). E ultimo acontecimentonan di un grupo di Venezolano cu ta yega Aruba y ‘molestia’ Arubianonan ta dunando e Arubiano un sentimento di insiguridad y ta yenando e ‘buchi’ di hopi arubiano. Te na e punto cu a cuminsa generalisa e situacion y ta hayando un ‘disgusto’ pa e nacionalidad Venezolano. Gobierno mientrastanto a urgi tur hende pa keda trankil, mientras cu nan ta trahando riba un solucion pa remedia e situacion di un ‘grupo di Venezolano’ cu ta causando problema.

PETICION PA VISA

For di algun dia, un peticion ta circulando, y cu rapidamente ta hayando atencion. Te cu awe mainta, e cantidad di persona cu a firma e peticion aki, a yega 200, cu e meta pa yega 1000. No ta conoci kico lo haci unabes cu e cantidad di 1000 firma keda acumula. Unicamente ta para e motivacion pa bin cu e lista di firma aki. Segun e peticion, ‘nos ta firma e peticion pasobra como comunidad, nos kier cambio inmediato, di loke ta pasado riba nos isla” e pagina ta bisa. Nan ta conciente cu nos isla tin multiple nacionalidad pa hopi aña, y ta ricibi turista di tur pais, y ta yama nan embahador.

MOTIVACION PA FIRMA PETICION

Loke a nota ta cu mayoria di e comentarionan di esnan cu a firma, ta firma pasobra nan ta sinti nan mes insigur riba e isla, debi na e fenomeno di e Venezolanonan problematico aki. “ Pa hopi aña, Aruba tabata safe y un isla feliz, of unda cu tabata reina felicidad. “Pero awe esey no ta e caso mas, unda cu nos como un comunidad ta bibando cu miedo y disgusto, pa e forma con Venezolanonan ta yegando Aruba y ta kibrando ley, manipulando, faltando respet, cometiendo crimen riba nos isla humilde contra loke antes tabata nos localnan contento pero awor rabia. “Nos kier sa ken ta bin nos isla” e peticion su meta ta sigui bisa.

REACCION DI GOBIERNO

Tabata ayera ainda cu prome minister di Aruba Mike Eman a comenta riba e caso aki riba 24ora.com, splicando cu mientras cu ta compronde e angustia cu tin, pa e pueblo toch keda ‘hospitalario’. Segun e mandatario, “Aruba ta un isla turistico y modelo den e forma hospitalario cu semper. A ricibi turista y imigrantenan. Pa e motibo ey semper a kere cu nos mester ta hopi cauteloso tambe den e forma con ta atende” e mandatario a sigui bisa. E mandatario a mustra tambe cu tin reto pa motibo di bishitantenan por ta den volumennan grandi of cu a cambia di caracter di e motivacion pa nan bishita. “Tin toch e responsabilidad tambe den comunicacion cu nos comunidad pa keda tene dilanti semper e sentido special humanitario di nos pais, di nos pueblo den e forma con nos ta ricibi nos turistanan y tambe den e tolerancia grandi y e capacidad cu Aruba a demostra desde su desaroyonan inicial di siglo pasa” e mandatario a sigui bisa. NOTA. Foto archivo di NoticiaCla.com riba garoshi di Venezolanonan cumprando cantidad di cerbez.