Asina e restaurant di Renaissance Island a keda despues di candela

ORANJESTAD - E prome potretnan di e situacion despues di e candela feroz di awe mainta na Renaissance Island ta mustra cu nada mes no a keda di e restaurant. Ta djies e base di e restaurant a keda, cu awor tin cu wordo reconstrui completamente. For di informacion di MetaCorp, NoticiaCla.com a compronde cu lo no solamente reconstrui awor, sino expande y hacie pues aun mas grandi. 

FLAMINGO ISLAND/BEACH

Pa awe, huespednan di Renaissance Resort cu kier a usa Renaissance Island, lo por usa Flamingo Island for di 12'or di merdia. Pa loke ta un actualisacion di e situacion di candela riba Renaissance Island, e gerente Paul Gielen a confirma mas detayes algun rato pasa. "E restaurant so a kima y no tabatin heridos. Y e restaurant ta sigura tambe. E staff y e flamingonan ta den bon estado".  Gielen a confirma un rato pasa na NoticiaCla.com. "Flamingo Island lo habri pa nos huespednan for di 12'or di merdia" Gielen a sigui bisa. E resto di e isla ta keda sera, pa asina e trahadonan por prepara esaki pa por ta cla pa maya. "Tur esaki mientras cu nos ta reconstrui nos restaurant atrobe". Fuera di e restaurant, nada otro no a daña. Y importante ta cu e flamingonan cu ta porta e propiedad mas popular y importante di e isla, ta sano y salvo. E gerente a manda  un potret actual di e flamingonan, cu ta mustra cu nan tur tey y no a haya ningun daño debi na e candela. 

RENAISSANCE ISLAND 

E facilidad cu a pega candela, a wordo construi 26 aña pasa ora cu a traha e isla, (tempo cu e tabata bou di maneho di cadena hotelero Sonesta). "MetaCorp sin duda lo haci uso di e momento aki pa comberti e reto den un oportunidad y lo construi algo mas grandi y miho riba e isla, pa por ofrece su huespednan un experiencia inigualabel", ta e mensahe cu NoticiaCla.com a haya awe mainta di e compania cu ta doño di e propiedad. 

E CANDELA

Un melding di candela riba Renaissance Island (ex Sonesta Island) a pone cu bomberonan ta na caminda pa e isla, pa wak con por combati e candela aki. Vocero di polis Liliana Rasmijn a confirma na NoticiaCla.com cu un melding di candela riba e isla, a drenta 7:35am. For di e gerente general di Renaissance mes, Paul Gielen tambe NoticiaCla.com a confirma cu tin candela, aunke cu e origen no ta conoci. "Ta parse algo electrico", Gielen a bisa NoticiaCla.com. Informacionan no oficial ta papia di cu parti di e cushina y laundry area lo ta na candela. Fuera di bombero, por a nota varios boto bayendo cu urgencia direccion pa e isla. Keda pendiente pa mas informacion. foto cortesia Ann Angela y Yolanda Hagelen. NOTA: E foto di flamingo ta uno actualisa di awe mainta!